Si Palui

Si Palui : Kawin Cerai Kawin

PALUI wan Garbus sawat bingung jua malihat kawalnya si Tulamak nang bilang rancak banar badangkaran wan bininya.

Si Palui : Kawin Cerai Kawin
DOK
Ilustrasi Palui

BANJARMASINPOST.CO.ID - PALUI wan Garbus sawat bingung jua malihat kawalnya si Tulamak nang bilang rancak banar badangkaran wan bininya. Karna rancak bahualan itu rancak jua inya bapisah ranjang bahkan sampai bacarai, Tapi imbah itu babulikan pulang karna ujarnya masih sama-sama sayang.

"Baiknya sakali kawin itu untuk saumur hidup, sahidup samati," ujar Garbus mamadahi Tulamak.

"Agama mambulihakan haja kawin itu labih dari sakali bahkan bulih jua sampai dua talu ikung," sahut Tulamak mambila diri.

"Kawin sarak itu bulih haja asal kuat alasannya karna sarak atawa cerai itu adalah gawian halal tapi paling kada disenangi ulih Tuhan," ujar Palui.

"Kalu aku masih wajar-wajar haja Lui ai, kada kaya bubuhan artis-artis itu banyak kawin cerai papadaaan dan selingkuh sasamanya karna ada baisian WIL (bibinian simpanan) dan PIL (lalakian kesayangan), gunta-ganti pasangan. Wayah bagandakan dan handak kawin pina maanduh-anduh janji sahidup semati, sakalinya kada lawas bahual dan basarakan. Perkawinan dianggapnya main-mainan haja," ujar Tulamak.

"Ikam Mak rancak jua kalu kawin cerai?" ujar Garbus.

"Kalu aku kawin cerai itu kada ka lain tapi wan biniku jua. Mulanya kawin lalu basarakan, imbah itu babulikan, lalu basakan pulang, ampihan sakaligus talak talu," ujar Tulamak tapi pina masih sayang wan bakas bini.

"Hahahaaa... rahasia Tulamak di tanganku," ujar Palui mangalakak tatawa.

"Kanapa maka ikam tatawa Lui? Rahasia napa?" ujar Garbus.

"Tulamak sawat bacina-buta wan aku. Wayah itu Tulamak handak babulikan pulang wan bininya itu, tapi karna sudah talanjur ditalak talu maka agama kada mambulihakan lagi kacuali bakas bininya itu biasa kawin wan urang lain. Wayah itulah aku manulungi Tulamak mangawini bininya walaupun cuma babarapa hari haja. Imbah dikawini babarapa hari itu lalu kusarak dan imbah cukup idah inya babulikan wan Tulamak," ujar Palui mambuka rahasia.

"Kawin ikam wan bini Tulamak itu pura-pura hajakah atawa bujuran?" ujar Garbus.

"Ampun maaf Mak-lah, karna ikam bacina-buta dan halal maka sawat jua aku marasani," ujar Palui pina supan. emhati(repro)

Editor: Didik Trio
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved