Si Palui

Si Palui: Sambahyang Nomor Dua

Karna takutan kalu ada apa-apanya wan Palui maka bubuhannya tulakan ka rumah Palui, Tulamak mambawaakan pisang goreng Garbus mambawa caturan.

Si Palui: Sambahyang Nomor Dua
Bpost/Riza
Ilustrasi Palui 

BANJARMASINPOST.CO.ID - SUDAH parak samingguan Palui kada kalihatan di langgar, maka galulah kakawalannya manakunakan. Sabab kada biasa Palui sampai salawas itu kada batamuan wan kakawanannya, paling-paling sahari dua wayah inya bulik kapahuluan. Itupun biasanya inya pasti bapadah wan bubuhannya.

Karna takutan kalu ada apa-apanya wan Palui maka bubuhannya tulakan ka rumah Palui, Tulamak mambawaakan pisang goreng, Garbus mambawa caturan handak mahibur mambawai Palui main catur.

"Ui Lui, napa diulah pina kakayubuh wan tapih?" ujar Garbus managur Palui wayah inya maumpani hayam.

"Napa habar maka pina taimbai mailangi aku?" ujar Palui.

"Ikam sudah baminggu-minggu ini kada kalihatan sambahyang bajamaah ka langgar, kami kira ikam garing dan Tulamak ada urusan panitia parbaikan. Banyak urang handak manyumbang tapi kada jadi karna ikam katuanya kadada," ujar Garbus.

"Kalu urang handak manyumbang ditarimakan haja, ada bandahara," ujar Palui.

"Sambahyang bajamaah itu pahalanya ganal sampai 27 kali pahala sambahyang saurangan," ujar Tulamak.

"Nah.......... kalu sual sambahyang, aku tahu haja banyak pahalanya tapi aku kaingatan ujar tuan guru wayah pamulaan balajar samalam dipadahakan bahwa sambahyang itu adalah nomor dua," ujar Palui mayakinakan bubuhannya.

"Wah, wah, kasihan. Rupanya kawal kita Palui ini saminggu kada sambahyang rupanya takaji nang salah," ujar Garbus.

"Ikam murtad Lui ai, kanapa maka wani mamadahakan bahwa sambahyang itu nomor dua. Sembahyang itu harus dinomorsatukan, didahulukan jangan ditunda-tunda sasuai waktu sambahyangnya Napa alasan ikam mamadahakan bahwa sambahyaan it nomor dua," ujar Tulamak manggasak handak tahu karna sudah pina balain kajian.

"Ampun maaf kakawalan ai, sabujurnya sudah matan dahulu jua bahwa aku tahu sambahyang itu nomor dua," ujar Palui mantap.

"Napa alasan fatwa wan dalilnya Lui?" ujar Garbus.

"Dangarkan dalilnya bahwa sambahyang itu nomor dua, karna nang nomor satunya adalah mangucap dua kalimah sahadat, nomor dua sambahyang, nomor tiga puasa, nomor ampat zakat dan nomor lima naik haji," ujar Palui mayakinakan kakawalannya.

"Ooooooo.......... itukah nang ikam maksud Lui?" ujar kakawalannya taimbai manarima alasan Palui itu. emhati(repro)

Editor: Elpianur Achmad
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved