Si Palui

Si Palui: Rijutnya Nang Larang

HARI itu bubuhan Palui bajanjian handak tulak maunjun ka Sungai Bangkau. Sabalum tulak, bubuhannya bakumpul di gardu.

Si Palui: Rijutnya Nang Larang
repro/banjarmasipost.co.id
Si Palui: Rijutnya Nang Larang 

BANJARMASINPOST.CO.ID - HARI itu bubuhan Palui bajanjian handak tulak maunjun ka Sungai Bangkau. Sabalum tulak, bubuhannya bakumpul di gardu. Hari sudah pukul sambilan, bubuhannya baluman haja tulak. Ujar mahadangi Tuganal nang lagi maantar bini ka pasar.

Sambil mahadang si Utuh Ganal bubuhannya bapapanderan. Napa haja dipanderakan, ka hulu ka hilir. Sakalinya liwatlah bibinian urang hilir bajalan saurangan sambil maingkuti payung.

"Lui, cuba ikam tangguh bibinian itu masih gadiskah atawa sudah balu," ujar Garbus.

"Kalu malihat buritnya masih kimpus maka pasti urang itu masih parawan," ujar Palui.

"Biar burit kimpus tapi baliknya ganal banar makanya musti inya itu sudah baranakan," sahut Tulamak.

"Nah.... ikam sabarataan salah tangguh cuba itihi bujur-bujur amun inya sudah parak ka sini," ujar Garbus.

"Oooo....., sakalinya si bancir Jumberi," ujar Palui wan kakawalannya tatawaan karna barataan salah tangguh.

Kada lawas liwat bini Palui wan bini Tukacil handak ka pasar. Kaduanya takajut malihat bubuhannya balum jua tulakan. Lalu bini Palui marawa:

"Uuuiii abahnya pabila lagi maunjun? Sudah siang napa maka masih takumpulan di situ?" ujar bini Palui. "Aku tahu bubuhan ikam itu bapura-pura haja maunjun, mungkin ada untingan di pahumaan. Kalu dihitung-hitung ungkus manukar umpannya maanam ribu rupiah, baiknya ditukarakan ka iwak," ujarnya.

"Sudah kupadahakan, maunjun ini kada sakadar mancari iwak tapi mahilangakan pikiran nang kalut karna saharian bagawi, nang ujar urang wayah ini disambat satres," jawab Palui.

"Bujur banar ujar Palui itu, baiknya bubuhan bibinian jangan curiga sabab maunjun itu sama lawan ubat, pikiran tatuju ka unjunan. Apalagi udara pahumaan nyaman sigar bisa mahilangakan satres tadi," ujar Garbus mambila Palui.

"Ada lagi nang paling nyaman dirasakan wayah maunjun," ujar Palui. "Bila umpan ujun kita wayah dikutil-kutil ulih iwak maka tarasa nyaman banar rijutnya. Marasaakan rijutnya itu nang larang banar haraganya. Labih larang pada haraga iwaknya. Rijutnya itu kada kawa diulah-ulah, kada kawa dicari dimanapun di dunia ini kacuali wayah maunjun karna adanya bakakajutan," sahut Palui.

"Ikam itu abahnya ai talalu banar maambung rijut sambaran iwak di banyu dipadahakan nyaman banar, kalu kaya itu ikam kada marasaakanlah rijutnya malam tadi sampai ikam takisir minta ampun kanyamanan," ujar nang bini sambil mangibit parut Palui.

"Naaahhhh..... hanyar katahuan, pantas haja rambut sampiyan badua pina habis mandi basah, ujar Garbus mahuhulut. emhati (repro)

Editor: Elpianur Achmad
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved