Kanal

Si Palui: Koran wan Quran

Ilustrasi Palui - Bpost/Riza

TIAP baisukan Palui katuju ka tuku Fajarnang manjual alat tulis, buku wan koran kesayangan urang banua naya, pinandu nang jaga tuku. ”Manukar korankah Lui?” rawa panjaga tuku.

“Malihat dahulu nah, adakah aku tampil atau kadadakah?” tangguh Palui.
“Uh ikam jangan khawatir, kalu ikam pasti tampil saban hari, kalau kadada ikam kada rami korannya?” lancar

Panjaga tuku bakisah ka Palui. Lihum bapair Paluinya malihat dirinya tampil di koran ni tiap hari.
Imbah sampai di rumah balajur ha Palui kada tahu diri lagi haur baca koran tarus.

”Ui Lui berita hangat-berita hangat, THR cair?” rawa Garbus nang kebetulan lewat di halaman rumahnya.
“Aku ni tukang bentor, kadada sejarahnya dapat THR, kecuali ha ikam paman sakulahan Bus ai, bisa jua dapat,” sambat Palui.

“Kalau pegawai kaya aku naya Lui ai, kadada dapat THR, malah pusing abah pimpinan daerah mamikirakan kami nang honorer ni supaya dapat jua THR,. Apa bulih buat ai, karana memang kadada anggarannya. Mudahan ada haja razaki di lain nang labih banyak, jadi kawa jua bahinak sadikit, gasan manukarakan baju hanyar anak wan bini di rumah nang handak bahari raya Idul Fitri tahun ni,” balas Garbus.

Imbah bajalan Garbus, kada lawas lewat rumah Palui, Tulamak merawa inya. ”Uh Lui kunu sudah mambaca suratkabar nitu ikam?” pahawai Tulamak.

“Biar ja kunu, tapi tahu informasi kekinian jua kaya urang,” sahut Palui.
“Urang wayahni mambaca koran online Lui ai?” lanjut Tulamak.

“Aku ni gaptek Mak ai, jadi kada paham cara mambuka hapi nang mamuat koran online nitu,” jawab Palui.
“Minta lajari Lui ai wan anak ikamkah?” saran Tulamak.
“Ah aku cukup suratkabar cetak haja Mak ai,” ucap Palui ringan.

Uh dasar bujurlah, dalam hati Palui, wayahni urang banyak mambaca koran online di hapi android masing-masing, baik nang anum maupun nang tuha. Makanya ada sudah suratkabar cetak di banua atau di negeri kita naya nang sudah almarhum ya, alias mati kada bangun kembali lagi iyakah. Karana kada banyak lagi pambaca suratkabar cetak nitu, akhirnya tutup sorangan.

Karana sajam labih sudah baca koran nitu, maka Palui ditagur ulih bininya. ”Sadang sudah baca koran. Uh abahnya ampih sudah baca koran baiknya pian baca Quran pula, mun kawa sakali khatam barang di bulan puasa naya,” ajak bini Palui.

“Uh bujurlah aku hanyar juz sapuluh, sadangkan bulan puasa sudah tanggal 26 Ramadhan?” Palui baistighfar.
Sudah nitu Palui lakas bawudhu, maambil ka Alquran nang bagana di dalam lemari haja sudah lawas. Han kecolongan haur baca koran tarus, Quran kada tabaca makalahan am, jangan diturutilah buhannya kalakuan Palui ni.

”Nang baik Lui ai, koran dibaca tiap hari supaya informasi kekinian, kada tatinggal ikam kaya urang bapandidikan sarjana jua ya dangan mambaca koran, saluruh informasi habar banua, habar nasional, maupun habar dunia tahu tu ikam. Sabaiknya jua baca Quran tiap hari, utamanya habis salat lima waktu nitu, sampatakan baca Quran satu halaman atau dua halaman, bah sip banar kalu kawa kaya nitu,” Palui gagarunum di rumah, nang bini lihum malihat kalakuan lakinya. (aan maulana/penulis matan kuta dudul,HSS)

Editor: Murhan
Sumber: Banjarmasin Post Edisi Cetak

Pimpin Selawatan di Panggung, Wanita Ini Mendadak Pingsan lalu Meninggal Dunia

Berita Populer