Kanal

Si Palui: Jariji Hangit

Ilustrasi Palui - Bpost/Riza

BANJARMASINPOST.CO.ID, BANJARMASIN - Si Palui tamasuk paroko berat. Sabungkus roko gudang garam isi 16 bilah cukup aja lawan korek api sabilah. Nang kaya apa caranya kawa macam itu? Artinya si Palui baroko sambung puting. Kira-kira sisa saparapat roko nang diisapnya, sudah dikaluarakannya sabilah lagi tumatan bungkusannya, dan amun sudah parak banar ka pilternya lalu dilikitnya roko nang hanyar tadi. Macam itu tatarusan digawinya.

Sadang jua pang bininya manyuruh inya baampih baroko, tatap kada diheraninya. Kalu inya muyak mandangar, hanyar dijawabnya.

“Amun handak kada bakukus dapur, ayu ja aku ampih baroko!”

“Apa hubungannya kukus dapur lawan kukus roko?” Bininya kada paham.

“Kalu manyuruh aku ampih baroko, sama ai lawan manyuruh aku guring,” ujar si Palui. – Amun kada baroko, nyaman aku guring tarus siang malam.
Tapi si Palui nang jadi guru itu, kada suah baroko sambil maajar. Kada mau inya mambawa roko ka dalam kelas. Kaena waktu istirahat di kantor guru, hanyar inya baroko bahimat.

Sebab itu murid-muridnya banyak nang kada tahu, nang si Palui itu paroko banar. Saban ada kasampatan waktu istirahat, atawa waktu jam-jam inya perai kada maajar, inya katuju bakuliling sakolahan, malilihat, kalu pang ada murid-muridnya nang barokoan.

Sampai ka kakus-kakus gin dimasukinya. Inya sudah bapangalaman pang waktu sekolah dahulu, basasambunyi baroko. Sampai bakunci kakus, piragah bahera saling lawasan, padahal mahabisakan roko sabilah dua bilah.

Si Palui tahu banar sampai ka ngaran-ngaran muridnya nang paroko. Tapi kada suah inya managur sacara langsung. Waktu di dalam kelas atawa waktu ada upacara panaikan bendera, lalu inya bapidato, mamadahakan bahayanya baroko, dan karugian-karugian lain.

Aku kada manangati ikam-ikam baroko, ujarnya. – Tapi jangan baroko di sekolahan. Dan coba ikam pikirakan, siapa nang tukarakan roko, kalu waktu sekolah sudah baroko, padahal ikam balum bisa bacari. Paling-paling bacari ka babawah lipatan kuitan di rumah!

Nang ngaran murid-muridnya banyak, jadi macam-macam ai kalakuannya. Ada nang manurut, tapi banyak jua nang kada. Kaena waktu istirahat, di mana-manakah bakumpul barokoan. Kakawalannya kadada nang waninya malaporakan, sebab waktu bulikannya kaena sakit awak ditampari bubuhannya. Rancak sudah si Palui maintai-intai, tapi baluman tatamu bubuhannya nang parahatan asik barokoan. Rancak waktu si Palui datang, mun kada badahulu tahu, atawa sudah habis tinggal mambuang putingnya aja lagi, sampat bubuhannya bubaran.

Tapi sakali waktu dapat jua si Palui manamui bubuhannya parahatan asik baroko. Rami tatawaan sambil maambulakan kukus ka atas. Sampai kada tahu, nang si Palui sudah badiri di higa bubuhannya. Katakajutan lantaran kada mangira sama sakali, badirian ai bubuhannya mahadapi si Palui, sambil tangan disambunyiakan di balakang. Si Palui kada sangit pinanya, tapi mambawai bubuhannya bapapanderan.

Macam-macam nang ditakunakannya. Tunggal ikungan takurijat, lantaran roko sampai mamakan jarijinya. Puntungnya kalapasan, tapi sakitnya masih karasaan rupanya. Hanyar si Palui masuk ka kantor guru. (HYA)

Editor: Elpianur Achmad
Sumber: Banjarmasin Post

VIDEO Isak Tangis Kerabat Korban Pembunuhan Bekasi: Tunjukkan Pembunuhnya Tuhan

Berita Populer