Kanal

Si Palui: Balangkasua

Ilustrasi Palui - Bpost/Riza

Palui sudah batahun-tahun diam di Jawa.

Tapi nang ngaran urangnya pambabal, maka bahasanya jua nang disurungnya. Mangartikah, kadakah urang lawan pamanderannya, tatap kada mau inya maubah laku.

Kalu bininya ada di higanya, maka bininya nang manjalasakan lawan bahasa Jawa, sebab bininya sudah pasih babanaran bahasa Jawa. Amun urang nang kada tahu asal-usulnya, dikira urang bininya itu urang Jawa asli ai.

Langgah awata lungguhnya dasar Jawa babanaran kalihatannya.

Tapi Palui di situ, di erte wadah inya diam dituhaakan urang. Sabab kalihatan pina mampu, pina wani, pina-pina macam-macam, dan pina saraba bisa dan saraba sanggup.

Nang nyata, sanggup manyuruhi urang. Kalu ada rancana, maka Palui nang maaturnya, tunjuk si ini dan tunjuk si itu nang harus manggawinya. Wan, biasanya cocok dan beres. Itu am jadi urang parcaya banar lawan inya.

Waktu itu di erte Palui ada kamatian. Sebab itu lalu ai Palui marentahakan lawan pambantu-pambantunya maedarakan les gasan mambari sumbangan. Sebab tekenan Palui, banyak ai kolehan sumbangan.

“Siapa nang maatarakan kaena,” jar Palui wan pambantunya.

“Siapa lagi kalu kada sampean!” jar pambantunya.

“Ayu ai kalu kaya itu! Tapi kaya apa caranya sakiran pas cara manyampaiakannya?” jar Palui pulang.

Lalu dipadahakan urang nang kaya apa caranya maucapakan rasa umpat badukacita.

Biar kada usah bahasa Jawa, bahasa Indonesia gin jadi aja! Jar urang mamadahi si Palui. Turut babelasungkawa kaya itu! “Hi-ih!” jar Palui sambil mahijaakan nang kaya apa maucapakan b-e-l-a-s-u-n-g-k-a-w-a tu!
Sampai di sana lalu ai Palui limbah bapanderan saraba sadikit, mamohon diri-ai handak bulik sambil maucapakan tanda baduka cita.

“Kami memberi sekedar sumbangan tanda turut balangkasua!” jar Palui sambil maunjuk amplok nang baisi duit sumbangan.

Nang ampun rumah dan ahli waris manarima. Urang takurihing mandangar Palui salah sambat. Belasungkawa disambatnya balangkasua. Untung kada di Banjar. Jaka di Banjar, ribut banar am urang mandangar, sebab arti balangkasua itu sama sakali kadada hubungannya lawan belasungkawa. (HYA)

Editor: Didik Trio
Sumber: Banjarmasin Post Edisi Cetak

Beredar Foto-foto Awal Penemuan Jasad Korban Pembunuhan Sekeluarga di Bekasi, 2 Anak di Kamar

Berita Populer