Kanal

Si Palui: Ada Jin (1)

Ilustrasi Palui - Bpost/Riza

TUMATAN lapangan terbang King Abdulaziz, jamaah Palui kada langsung ka Mekah, tapi ka Medinah dahulu. Macam itulah aturan mainnya, jamaah haji nang datang baluman tanggal 25 Zulkaedah, haji tamattu ngarannya, musti baumrah dahulu, hanyar bahaji.

Aturan baumrah macam ini: Musti sholat Arbain (40 waktu) di Madinah. Jadi paling kada 8 hari di Madinah. Sudah itu hanyar ke Mekah, manggawi tawaf dan sa'i.

Tuntung itu, artinya tuntung sudah baumrah. Tinggal mahadang waktu malaksanakan ibadah haji aja lagi. Caranya kaya ini: Tanggal 8 Zulhijjah tulak ka Arafah. Tanggal 9 Zulhijjah wukuf di sana.

Limbah tagalingsir matahari, tulak ka Mina.Tapi musti singgah di Muzdalifah, dan limbah tangah malam hanyar boleh maninggalakan Muzdalifah. Tanggal 10 Zulhijjah, tumatan Mina, tulak malontar ka Jumratul Akabah. Limbah itu tanggal 11, 12 dan 13 Zulhijjah tumatan Mina, malontar di Jumratul Ula, Jumratul Wusta dan Jumratul Akabah. Tuntung malontar tanggal 13 itu, limbah tangah hari tulak ka Mekah. Di sana tawaf dan sa'i, istilahnya tawaf ifadah.

Kalu itu sudah tuntung, artinya kita sudah tuntung malaksanakan ibadah haji, dan hajilah kita. Waktu handak bulik ka banua maninggalakan Mekah, jamaah tawaf dahulu nang dingarani tawaf wada, artinya tawaf perpisahan.

Nah, limbah sudah sampai di Madinah, bis manuju maktab, wadah manginap jamaah.Rumahnya tinggi, anam tingkatnya. Pas Palui laki binian lawan kai dapat wadah di tingkat anam, pamulaan masam muha Palui.Tagal limbah dipadahakan gasan turun naik di situ ada liftnya, hanyar Palui marasa lapang.

“Biar di tingkat saratus diandak urang, amun turun naik mamakai lift hakun aja aku!” ujar Palui. “Bisalah macet panangahan jalan?” bininya batakun.

“Bisa, kalu listriknya mati,” Palui manyahuti, “Tagal di sini listrik kada suah mati!” Palui mangganalakan hati bininya. Indah pang inya mangesahakan pangalamannya waktu takurung di dalam lift waktu listrik mati. Tapi kajadian itu di Jakarta pang.

Saban hari Palui laki binian lawan kai, dan jamaah lain nang dapat kamar di tingkat atas musti turun ka tingkat satu lantaran saban hari musti solat di masjid Nabawi Madinah, sakira jangan sampai ada waktu nang katinggalan. Kalu ada nang tatinggal, alamat kada cukup 40 waktu am sembahyangnya, sebab di Medinah 8 hari aja.

Jadi saban kalian turun atawa naik, musti baimbai batalu lawan kai. Sidin kada wani turun atawa naik saurangan sebab kada bapangalaman sama sekali turun naik lift.

Halaman
12
Editor: Didik Trio
Sumber: Banjarmasin Post Edisi Cetak

Ditemukan Tewas di Sawah, Mahasiswi Aceh Ternyata Dibunuh Pacar karena Alasan Ini

Berita Populer