Kayu Bapangkih

LAWAS Palui kada cangul atawa kalihatan di kampung. Kakawalannya sarantang-saruntung nangkaya Utuh Garbus, Tulamak wan Tuhirang haja bingung kada tahu kamana Palui sabulanan ini.

“Mungkin tulaknya bagagasakan banar karna panting,” ujar Garbus.

“Tapi kalu sampai sabulanan maninggalakan banua mustinya ada jua buriniknya, bakirim surat atawa bapasan supaya jangan dianggap gaib,” ujar Tulamak.

Kaya apa kalu kita takunakan wan bininya,” ujar Garbus.

“Aku akur supaya tahu di mana Palui,” ujar Tulamak, lalu bubuhannya tulakan ka rumah Palui manamuni bininya.

“Ui bini Palui, ka mana abahnya?” ujar Garbus.

“Kami sudah dandaman banar lawas kada batamuan, maklum kawan kantal,” ujar Tulamak.

“Hi-ih, aku kada sawat mahabari bubuhan ikam bahwa Palui dibawai kawalnya ka hutan di gunung sana,” ujar bini Palui.

“Napa digawinya di hutan sana?” ujar Garbus.

“Wayah tulak itu ujarnya inya umpat kawalnya bausaha mangayu,” ujar bini Palui.

“Wah, talalu banar Palui kada babawaan bagawi di HPH pakayuan sana,” ujar Tulamak pina manyasali.

“Dasar Palui itu handak sugih saurangan bagawi di HPH,” ujar Garbus.

“Hadangi sahari dua hari ini, ujarnya inya handak bulik,” ujar bini Palui.

Imbah dua hari cangul-lah Palui.

“Bubuhan kawal sampiyan Garbus wan Tulamak maniwas banar karna sampiyan bagawi di HPH Kayu kada babawaan,” ujar bininya.

“Kaina kubawai jua, asal bagawi hakun bapaluhan karna gawiannya barat. Bagawi di kayu ini kada nyaman, uyuh, ngangal, banyamuk,” ujar Palui lihum.

“Napa ngaran HPH-nya abahnya, pasti ampun bubuhan kunglumerat Jakarta itu,” ujar bininya.

“Siapa nang mamadahakan aku bagawi di HPH?” ujar Palui.

“Kalu bagawi di hutan itu pasti ampun bubuhan HPH kada mungkin tabangan liar,” ujar bininya manggasak.

“Ikam ini kada paham, bujur haja aku ini bagawi kayu tapi gawianku adalah mambalah kayu bapangkih, imbah dibalah lalu diikat, dikabat lalu dijual gasan urang bamasak,” ujar Palui mangalakak tatawa. (rep/tam)