Si Palui: Takacak Intan

Mamaku kada usah ka gunung atau mandulang ka pandulangan intan nitu, cukup di banua haja, di Telaga Langsat sana.

Si Palui: Takacak Intan
BPost Cetak
Ilustrasi palui 

RAMI urang-urang di kampung Palui bahari madam dua atau tiga bulan ujar habar mandulang intan wan mandulang amas. Ada nang kulihan kawa manukar mutur, kawa mambaiki rumah wan ada jua nang sadih buliknya jadi mayat karan panyakit malaria ganas di daerah pandulangan intan, amas. Manandakan batapa sulitnya mancari usaha di banua lagi bahari.

”Pas kesah sadih di pandulangan intan atau amas Bus ai, bulik ka rumah jadi mayat, diantar urang wan mutur ambulan akibat panyakit di pandulangan sana kada kaaritan lagi, ada jua nang mati akibat tanah lungsur di pandulangan amas, banyak ai habar kada bagus,” Palui prihatin mangganang urang di kampungnya maninggal dunia bausaha mandulang intan.

“Itu kesah nang sakitnya, nang nyamannya ada ai kalu Lui?” takun Garbus.

“Ada jua pang nang nyamannya, makanya urang kadada jaranya jua bausaha mandulang intan atau amas, karana hasilnya kawa manukar mutur, baulah rumah, naik haji wan lainnya,” sahut Palui lihum.

“Han jarku ya, itulah suka dukanya usaha, tatap sampai kiamat kadada jaranya urang mandulang amas atau intan ya kalu Lui?” Tulamak manyahut jua.

“Nang panting kita bausaha , batawakal mudahan kulihan banyak bausaha mandulang itu,” Palui basemangat manjawab.

Rami urang bapanderan mandulang amas wan mandulang intan, mama Palui waktu itu sidin lagi masih bawarung makan di pasar, tahabar takacak intan.

”Arwah mamaku bahari buhannya ai, sampat ditumburakan urang, karana sidin takacak intan ganal banar, murni intan 24 karat,” Palui sambil lihum mambawa habar.

“Sugih Lui lah ikam kawa naik haji saban tahun sakaluargaan, jaka wayah ne barapa miliarkah haraganya.

Kada bataha itu pang ngarannya intan parmata, kadada pamatinya bila dijual,” ujar Garbus.

“Mamaku kada usah ka gunung atau mandulang ka pandulangan intan nitu, cukup di banua haja, di Telaga Langsat sana. Pas bajalanan handak mancari pambantu gasan bagawi di warung makan sidin, takacak intan nang baikung, nang bisa bagincu, tumbur urang sapasaran ?” Palui bisa mambawa habar, heboh buhannya.

“Han jarku Palui nih, bisa bagaya habis aku wan Tulamak takajut jua mandangar takacak intan sakalinya pambantu warung ngarannya Intan, langkar banar, sahingga payu mama Palui mambuka warung nasi, iya kada Lui?” lihum jua Garbus.

“Iya banar Bus ai,Mak ai? Intan ngaran binian nang mambantu mamaku bahari bawarung nasi, jadi payu banar warung sidin, urangnya langkar sakalinya. Ada lakian sampai tiga kali ka warung mamaku duduk dalam sahari, makan minum inya?” tatawa Palui.

Kaganangan wan Intan baikung di warung mamanya, sudah itu pang? takun Tulamak.

“Kada lawas Intannya balaki, jadi bakirip pulang warung mamaku payunya? Bunga warungnya alias si Intan nitu ampih jadi pambantu di warung mamaku dibawa lakinya ka Samarinda. Bah iya pang?” ujar Palui rami bakesahan. (aan maulana/anggota Dewan Kesenian HSS)

Editor: BPost Online
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved