Si Palui : Handuk

BANJARMASINPOST.CO.ID - WAYAH kadada gawian tadi Palui, Garbus wan Tulamak bajalanan ka kuta, apalagi hari itu adalah hari pasar jadi banyak nang kawa dilihat. Imbah muyak bakukuling pasar, bubuhannya marasa kauyuhan.

"Baiknya kita baistirahat dahulu Lui ai, parut sudah kalurukan," ujar Garbus.

"Aku katuju haja," sahut Tulamak. "Baisukan tadi aku kada sawat makan lantaran badadas handak umpat bubuhan ikam," ujarnya.

"Kalu handak baistirahat baiknya kita mancari warung makan nang ada tulisan haraganya supaya kita kawa maukur wan duit di kantung. Maklum haja warung di kuta, haraga makanan wan nginumannya kada sama wan di kampung kita," ujar Palui.

"Supaya jangan tapakalah kita bajanji mamasan nginuman sacangkir haja nang bagula lalu nang lainnya teh lapas, lalu kita campur supaya samunyaan tarasa manisnya. Kaya itu jua makanan kita pasan tiga macam lalu masing-masing umpat marasani," ujar Garbus.

"Aku akur haja supaya sama rasa," ujar Tulamak.

"Kalu sama rasa, harus bagi rata mambayarinya," sahut Palui, nang diakuri sabarataan.

Imbah tuntung makanan, limbui tapaluh bubuhannya. Ada nang kapadasan, kapanasan dan ada jua kasusulitan. Lalu masing-masing mancari rasa supaya nyaman, ada nang bakipas, babuka baju dan ada jua nang baastilah duduk di luar warung mancari angin.

"Kada biasa aku kakanyangan kaya ini, parut rasa gambung banar karna cucuk masakannya ditambah pulang sambal acannya nang padas manyalingit," ujar Palui.

"Umai Lui paluh ikam ganal-ganal kaya bigi jagung sampai basah jimus baju ikam. Cuba pang supaya disapu-i wan saputangan," ujar Tulamak managur Palui.

"Itu tandanya awak sihat," sahut Palui. "Tapi aku kadada baisian saputangan gasan malapnya," sambil inya manyirit ka saputangan handuk lap tangan nang bagantung di warung itu. Bagamat inya badiri lalu diambilnya.

Sambil maitihi ka kiri ka kanan lalu langsung bahimat malapakan ka paluh di awaknya, imbah itu lalu digantungnya pulang ka bakasnya.

Kada lawas Garbus masuk ka dalam warung, karna marasa muntung wan tangannya balum dilap maka inya langsung maambil sarbit handuk nang bagantung tadi, bahimat manyapui muntungnya.

"Haaacis....haaaciss....," ujar Garbus babarapa kali wahin.
"Kanapa Bus?" ujar Tulamak.

"Bau ganyir, bau lahak, babau haruk banar sarbit handuknya," ujar Garbus manyumpah sarik ka tukang warung.

"Palui wan Tulamak kalikikan mananawaakan Garbus. Sabar Bus, jangan lakas sarik, maklum saputangan urang banyak maka macam-macamlah baunya, tamasuk bau kurap paluh si Palui karna sarbit itu tadi diulah Palui gasan manyapu paluhnya," ujar Tulamak mamacahakan rahasianya.

Mandangar bakas paluh kurap Palui, manggaruak Garbus mamuakakan isi parutnya. (emhati/repro)