Si Palui

Si Palui: Mudahan Lawas Baahnya

Rupanya karna tatarusan hujan itu maka banyu sungai naik, lalu maulah banjir.

Si Palui: Mudahan Lawas Baahnya
BPost Cetak
si palui 28/6/2019 

BANJARMASINPOST.CO.ID, BANJARMASIN - SUDAH samingguan ini di kampung Palui bilang turun hujan siang malam.

Rupanya karna tatarusan hujan itu maka banyu sungai naik, lalu maulah banjir.

"Kita ini saraba salah Bus ai," ujar Tulamak gagarunum.

"Napa nang ikam panderakan Mak pina gagarunum," ujar Garbus.

"Wayah panas musim panas kakaringan dan wayahnya hujan kabaahan," ujar Tulamak.

"Itu tandanya alam kada basahabat lagi wan manusia Mak ai," ujar Garbus.

"Ikam salah Bus ai. Nang kada basahabat itu justru manusianya. Manusia katuju bararusak, hutan-hutan ditabangi, kakayaan alamnya dikaruk kada baingat," ujar Palui umpat bapander.

"Ooo.. kaya itukah Lui," ujar Tulamak.

Baca: Si Palui: Jambatan Balum Tuntung

Baca: Si Palui: Mancuba Kada Babayar

Baca: Si Palui : Ukuran Kamakmuran

Baca: Si Palui: Bagundul Sabalah

"Kalu aku nang paling katuju adalah musim hujan. Bahkan makin katuju lagi bila ba’ah. Dan kalu kawa ba’ahnya lawas-lawas biar sampai samingguan," ujar Palui lihum.

"Kalu ba’ah sampai baminggu-minggu itu artinya bencana dan musibah Lui ai, kanapa maka ikam katuju? Ikam itu kada baprikemanusiaan Lui ai. Kasihan bubuhan warga kita nang rumahnya tarandam dan jalanan wan halaman dihibaki banyu," ujar Garbus.

"Nyaman haja ikam Lui ai karna rumah ikam tinggi, jadi kada kabanyuan," ujar Tulamak.

"Tadi sudah kusambat bahwa ba’ah itu tagantung hujan dan hujan itu karna cuaca nang kada manantu maka akibatnya ba’ah. Jadi ba’ah itu kada urusanku, aku hanya baharap supaya ba’ahnya lawas. Itu haja," ujar Palui.

"Kada usah bamacam-macam baulah alasan Lui ai. Aku paham haja ikam katuju banyu ba’ah itu lawas-lawas karna rumah tinggi maka tiap baisukan dan siangnya ikam pasti duduk di palatar rumah mahadang bibinian lewat di muka rumah. Karna jalanan babanyu sampai lintuhut sampai paha maka tapaksa inya manyingsing tapih atawa rok bajunya sampai ka pahanya," ujar Tulamak mangalakak tatawa paham kalakuan Palui.

"Itulah razakiku Mak ai malihat batis wan paha nang lamak mungkal, putih mulus, mampunut, aduhai..," ujar Palui pina himung.

(mht/rep)

Editor: Edinayanti
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved