Si Palui

Si Palui : Gawian nang Cucuk

SASAR tahun sasar ngalih bacari gawian, apalagi gawian jadi pagawai. Ulih karna itu Palui wan kakawalannya sampai wayahini kada baisian gawian tatap.

Si Palui : Gawian nang Cucuk
Dok Banjarmasinpost.co.id
Si Palui : Gawian nang Cucuk 

BANJARMASINPOST.CO.ID - SASAR tahun sasar ngalih bacari gawian, apalagi gawian jadi pagawai. Ulih karna itu Palui wan kakawalannya sampai wayahini kada baisian gawian tatap. Gawian bubuhannya itu sarampangan, napa haja digawi asal jadi duit. Hari ini manabas, isuk batukang, isuknya bakabun, mancari iwak, mambalantik sampai maujek samunyaan digawi.

"Gawian kita ini ngarannya gawian ramak rampu Lui ai, satiap nang ramak rampu pasti kada pruf," ujar Garbus.

"Dasar harat ikam Bus ai, sudah bisa bapander bahasa luar nageri" ujar Palui mamuji.

"Pruf itu tulisnnya nang bujur adalah profesional alias ahli jadi kada gawian sarampangan," ujar Garbus pina saraba tahu.

"Nah, kalu ikam bapander pruf, cuba pang gawian napa nang cucuk gasan kawal kita si Tulamak ini?" ujar Palui manunjuk Tulamak nang hanyar datang.

"Tulamak ini karna awaknya lamak, panjang basar dan bapangaruh maka gawian nang nang paling cucuk adalah jadi satpam atawa jadi hansip paling kada jadi wakar jaga malam," ujar Garbus.

"Tangguhan ikam itu kada cucuk Bus ai, gawian nang cucuk dan sudah kugawi adalah jadi asisten, mambakingi bos. Kamana haja bos tulak aku pasti mandampingi sidin, jadi aku adalah ajudan nang disayangi bos. Bahkan bahanu sidin minta bisiki napa nang harus digawi dan napa nang harus diucapakan," ujar Tulamak baagak.

"Oooooo...... pantas haja bos ikam itu rancak tasalah pander, rupanya karna tukang bisiknya bungul," sahut Palui lihum.

"Sabujurnya bisikanku itu pas haja Lui ai, tapi sidin nang salah dangar karna sidin tutulian lalu luput manyambatnya," ujar Tulamak kada hakun disalahakan.

"Kalu kaya itu cucuk wan watak ikam katuju manyasatakan urang tamasuk manyasatakan bos ikam saurang," ujar Garbus.

"Kalu manurut pandapatku, ampun maaflah Mak bahwa gawian ikam ini nang paling cucuk jadi wartawan tukang kodak," ujar Palui.

"Kada cucuk Lui ai karna jadi wartawan kodak itu harus lincah. Awak Tulamak ganal wan barat jadi kada bisa bagarak laju," ujar Garbus.

"Napa partimbangan ikam Lui maka dipadahakan gawianku nang cucuk adalah jadi wartawan tukang kodak?" ujar Tulamak himung sambil tatawa takintip-kintip matanya.

"Partimbanganku karna, ampun maaflah Mak, cucuk wan kaadaan mata ikam nang sintip sabalah. Jadi kada usah bakijip mata lagi bila mangeker," ujar Palui manyindir Tulamak.

"Sabujurnya aku himung dipuji dan diambung dipadahakan cucuk jadi wartawan tukang kodak karna mataku sintip sabalah," ujar Tulamak secara jujur mangakui kacacatan matanya. "Tapi walaupun mataku sintip sabalah tanyata banyak bibinian nang malihumi dan mananawai aku, dikiranya aku mengijipi mata alias main mata handak wan inya," balas Tulamak kada hakun kalah. (mht/rep)

Editor: Didik Trio
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved