Haruan Tarus, Papuyu Tarus

BANJARMASINPOST.CO.ID - Baisukan itu Garbus wan Tulamak mandatangi Palui di rumah. Bubuhannya handak mambawai Palui maunjun bacari iwak. Karna hanyar haja tuntung musim katam, maka pasti banyak papuyunya.

"Umpatkah Lui ikam mancari iwak ka Guntung Papuyu sana? Kabujuran hanyar musim katam pasti nyaman banar diunjuni karna iwaknya banyak," ujar Tulamak wan Garbus.

"Mancari iwak ini sabujurnya bisa dipadahakan nyaman dan bisa jua dipadahakan ngalih. Nyaman kalu iwaknya banyak kalu pamatukan dan ngalih kalu kada bisa maunjun. Dahulu wayah aku mulai maunjun, nang nyaman itu adalah marasakan kujatnya apalagi bila wayah ma-ajar, kujat mangujat apalagi bila wayah taimbai mangujatnya dasar nyaman banar," ujar Palui.

"Ikam itu Lui ai kidas banar bila bapander pasti kada jauh wan nang satubal itu," ujar Garbus.

"Aku asa uyuh Bus ai, maka aku kada munjun aku handak malukah haja," ujar Palui.

Baca: Tungro Serang Sejumlah Kabupaten, Stok Beras Kalsel Aman Hingga 2020

Baca: Lagi, KPK Periksa Mantan Bupati HST

Baca: Gubernur Isran Noor Sebut Spekulan Lahan Ibu Kota Gantung Diri

Baca: Bentrok di Deiyai Papua, Massa Rampas 10 Senjata Api TNI dan Polisi, 1 Prajurit Gugur, 2 Warga Tewas

"Tasarah ikam haja Lui ai, ayu kita tulakan baimbai dan di guntung kaina kita bapisah lalu bulikannya bajanji di warung julak Amban," ujar Garbus.

Tulamak wan Garbus mambawa babarapa bilah unjun sedangkan Palui mambawa lukah. Kamariannya imbah ashar bubuhannya batamuan di warung julak Amban, lalu masing-masing bakisah pakulihan.

"Ikam pakulih napa Mak pina kancang bakul," ujar Garbus.

"Alhamdulillah, rupanya sasuai mimpi bahwa hari ini pakulihanku dapat haruan ganal-ganal, barat manyahannya. Ikam pang Bus kaya apa," ujar Tulamak

"Kalu di guntung ikam itu sarangnya iwak haruan, tapi di guntungku sarangnya papuyu makanya pakulihanya malima kilu," ujar Garbus baagak. "Ikam pang Lui kaya apa, banyak juakah hasil lukahnya?" ujar Garbus.

"Sama haja wan bubuhan ikam, haruan tarus, papuyu tarus, sapat tarus ...," ujar Palui kada hakun kalah.

"Umpat malihat Lui iwaknya, kalu pang sama ganalnya wan iwakku," ujar Garbus sambil mambuka bakul Palui hasil malukah.

"Mana iwak haruan, iwak papuyu wan iwak sapatnya, nang kulihat ini samunyaan iwak anakan, iwak kalacingan," ujar Garbus.

Baca: Aktor Aquaman dan Anjingnya Terkurung 2 Jam dan Kelaparan, Jason Momoa Gagal Bobol Atap Lift

Baca: Kelompok Si Gila Cs Serang dan Bakar Klub Penari Telanjang di Meksiko, 25 Orang Tewas

Baca: Tunjukkan Bukti Rekam Jejak Capim Bermasalah, KPK akan Undang Pansel Jumat

"Aku kada jadi malukah Mak ai, lalu kuganti manangguk haja," ujar Palui.

"Maka tadi ikam bapadah bahwa pakulihnya adalah haruan tarus, papuyu tarus...," ujar Garbus mahuhulut.

"Anu Bus ai ... lukahku bungkas dimasuki bidawang, lalu imbah masuk iwak haruan, haruan tarus ... masuk iwak papuyu, papuyu tarus ... maksud tarus adalah baliwat kada sangkut di lukahku, makanya aku tapaksa manangguk wan tapihku dan iwak kalacingan. Inilah hasilnya," ujar Palui kada kawa bakutik lagi karna kakalahan. (mht/rep)