Si Palui

Si Palui: Razaki Bakurang

KADA kaya biasanya Tulamak saharian ini pina kada tapi banyak basuara.Imbah anu talihat inya rancak banar mangalamun. Amun dipanderi paling jawabannya

Si Palui: Razaki Bakurang
Dok Banjarmasinpost.co.id
Si Palui: Razaki Bakurang 

BANJARMASINPOST.CO.ID - KADA kaya biasanya Tulamak saharian ini pina kada tapi banyak basuara. Imbah anu talihat inya rancak banar mangalamun. Amun dipanderi paling jawabannya baanggut atawa bageleng kapala haja.

"Mak.. ui Tulamak. Napa haja nang dipikirakan maka pina taungut tarus?" ujar garbus. Rupanya munyak jua inya malihat Tulamak nang kada tapi sing bunyian.

"Anu.. aku sadih, banyak banar makanan nang kada bulih dimakan, kada bulih makan daging, kada bulih makanan nang baminyak-minyak, jangan makan nang masin-masin, kurangi nginuman bagula, macam-macamlah," ujar Tulamak pina kaciwa.

"Itu artinya awak ikam nang lamak itu tarancam bamacam-macam panyakit Mak ai," ujar Garbus.

"Kalu sudah ada pantangan dan banyak makanan nang kada bulih dimakan, itu artinya ikam sudah diparingatkan ulih Tuhan," ujar Palui umpat manyahut.

"Diparingati kaya apa Lui?" ujar Tulamak kada paham.

"Ikam sudah diparigati Tuhan supaya jaga kasihatan dan jangan talalu rakus lagi bamamakan," ujar Palui.

"Ikam ini talalu pintar Lui ai, kanapa maka wani mamadahakan Tulamak itu diparingati Tuhan hanya gara-gara inya disuruh maatur makanannya," ujar Garbus malawanakan Tulamak.

"Kita hidup ini, samunyaan razaki sudah diatur ulih Tuhan. Jadi bila Tulamak kada dibulihakan mamakan jenis makanan tertantu baarti sudah dibatasi razakinya," ujar Palui

"Nang mambatasi makananku itu adalah mantri puskesmas Lui ai," sahut Tulamak.

"Sama haja Mak ai. Itu artinya Tuhan mambatasi razaki ikam, mambatasi makanan ikam liwat muntungnya pak mantri puskesmas, kada langsung kaanu ikam," ujar Palui.

"Makanya ikam harus sadar Mak ai, umur makin batuha, awak panyakitan dan makanan makin dikurangi Tuhan," ujar Garbus paham.

"Dibatasi makanan, disuruh maatur makanan, artinya lagi Tuhan manyuruh tunggal butingan razaki dikurangi, tunggal butingan kanikmatan diambil, kada bulih makan daging, kada bulih nginum bagula, kada bulih mamakan makanan talalu masin, kada bulih mamakan makanan nang baminyak-minyak, kada bulih baruku, makanan harus batakar kada bulih talalu banyak," ujar Palui.

"Jadi kaya apa baiknya Lui?" ujar Tulamak pina putus asa.

"Baiknya basabarlah, banyak-banyaklah baistigfar, jangan kada ingat manggawi nang lima waktu. Nang panting patuhilah anjuran mantri itu, insya Allah panyakit ikam waras, paling kada bakurang" ujar Palui mambari nasihat karna kasihan malihat Tulamak pina sadih banar. (mht/rep)

Editor: Didik Trio
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved