Si Palui

Si Palui: Bacacap Minyak

Kamarian itu takumpulan Garbus, Tulamak, Tuhirang wan si Palui. Bubuhannya, dudukan di palatar rumah Palui nang hanyar dibaiki.

Si Palui: Bacacap Minyak
dok/banjarmasinpost.co.id
Si Palui Baminyak 

BANJARMASINPOST.CO.ID - Kamarian itu takumpulan Garbus, Tulamak, Tuhirang wan si Palui. Bubuhannya, dudukan di palatar rumah Palui nang hanyar dibaiki, rami mamanderakan musim buah nang kada ampih-ampih, basambung tarus. Musim durian haja baluman habis, cangul musim rambutan, kada lawas tadi datang pulang musim tiwadak manyambung.

"Bubuhan ikam pina lancar mamander buah, rakunganku rasa karing," ujar Tuhirang manyindir.

"Aku paham haja disindir Rang ai," ujar bini Palui manyahut sambil mambawa baki baisi banyu teh. Kada lawas imbah manyurung teh, bini Palui kaluar pulang mambawa pipiringan minyak lamak.

"Nah, minyak lamak ini musti gasan baurutan, ayu siapa nang batis tangannya tasalihu kuurut," ujar Tulamak.

"Hadangi kawannya," ujar Palui manyala pander. "Nah, iya kalu?" lanjut Palui imbah inya malihat bininya mambawa tiwadak sudah bakuyak, kuning, biginya ganal-ganal. "Ayu silahkan dimakani tiwadak putikan di kabun mintuha," ujar Palui manyuruh karna malihat Garbus wan Tulamak pina manyirit.

"Garbus manjumput dua talu bigi, lalu langsung mancacap ka minyak di pipirangan, nyam-nyam manyuap ka muntung."

"Malihat Garbus mancacap, Tulamak maumpati jua, langsung mancacap ka minyak di pipiringan, lalu kiyap-kiyap manyuap pina kanyamanan banar."

Malihat Garbus wan Tulamak pina kanyamanan, Palui managur. "Kaya apa rasanya Bus?" ujar Palui manakuni sambil lihum karna bingung malihat bubuhannya pina rakus banar mancacap ka minyak.

"Garbus wan Tulamak kada kawa manyahut hanyar takulum-kulum sambil maacungakan ibu jarinya, mamadahakan hebat."

"Astagfirullah ... astagfirullah," ujar bini Palui kabingungan.

"Nyaman banar, nyaman banarrr ... malancar managuknya," ujar Garbus taimbai manyahutnya. "Kanapa maka ikam pina bingung malihat kami kanyamanan makan tiwadak," ujar Tulamak batakun ka bini Palui.

"Aku bingung wan hiran-hirannya, karna saumur hidupku balum biasa malihat urang makan tiwadak bacacap ka minyak," ujar bini Palui.

"Tapi, kanapa maka disurung ka anu kami," ujar Tulamak.

"Minyak lamak itu kada gasan mancacap tiwadak, tapi gasan ... gasan maminyaki tangan supaya gatah kada marikit ka tangan. Dasar batat kada balampu bubuhan pian ini, sama haja wan abahnya kanapa maka kada mamadahakan cara manggunakan minyak lamak itu," ujar bini Palui gagarunum lalu masuk ka dalam. (ivd/mht)

Editor: Elpianur Achmad
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved