Tambahi Kakurangannya

BANJARMASINPOST.CO.ID - "Napa pina masam Bus?" takun Tulamak.

"Aku tadi di jalan batamuan wan julakku," ujar Garbus.

"Napa hubungannya wan muha ikam nang talipat duabelas tu?" ujar Palui.

"Julakku tadi bahutang duit ka aku Lui ai, padahal duit itu sagan manukar ruku. Kada nyaman jua aku kada mahutangi," ujar Garbus.

"Oooo... masalah ruku kah sakalinya, sangkan napa kah," ujar Palui.

"Adakah bubuhan ikam baisi ruku? Masam muntungku nah, parak satangah hari aku kada baruku," ujar Garbus maminta ruku.

"Aku kahabisan jua Bus ai. Tapi mun handak baruku jua, ini nah kujulungi duit. Tukarakan ruku nang paling harat merek 345, kakurangannya tolong tambahi akan," ujar Palui sambil manjulungi duit ka Garbus.

"Amun manambahi aku akur haja Lui ai, asal kawa baruku harat kita hari ini," ujar Garbus langsung tulak ka waruk julak Isul manukar ruku nang paling harat sasuai wan susuruhan Palui.

"Barapa lak ruku ni harganya?" ujar Garbus manunjuk ka ruku nang harat

"Haraganya Rp 12.500,- ruku paling harat," ujar julak Isul manjulung ka rukunya.

Ranai Garbus limbah mandangar harganya. Limbah babulik ka wadah kakawalannya Garbus langsung sarik-sarik.

"Ikam ni talalu-lalu Lui ai, aku disuruh manambahi kakurangannya. Kukira tadi saribu dua ribu haja, sakalinya liwat pada nang ada," ujar Garbus kasangkalan hati.

"Barapa garang ikam manambahi?" ujar Palui lihum.

"Ikam manjulung lima ribu sedang haraga rukunya dua belas ribu lima ratus. Baarti aku manambahi Rp.7500,- Artinya tabanyak manambahinya pada duit nang ikam julung," ujar Garbus marasa di akali.

"Ha... ha... itu artinya ikam ba-amal Bus ai. Isap haja sudah daripada masam liur," ujar Tulamak manawaakan.

"Lawan kada pintar jua Mak ai... Amun sudah tahu banyak manambahi, masih ja hakun manukar nang larang," ujar Palui tatawa jua. (bpost/fai)