Editor: Alpri Widianjono

BANJARMASINPOST.CO.ID - Ujar urang amun buah kada jauh gugur matan pohonnya, kaya itu jua Palui wan anaknya dasar kada lain kalakuan lawan sifatnya.

Amun urusan mamintari urang paling harat sudah, tapi amun urusan sakulah rancak numur uncit. Nang ngaran anak palui rancak banar disariki di sakulahan napa kalakuan pina pambabal.

Nangkaya hari itu, jam sapuluh anak Palui sudah bulik ka rumah sambil manangis-nangis.

"Napa nak, bakalahikah?" ujar Palui.

"Kada bah ai, ulun tadi disariki guru," ujar nang anak ba adu adu.

Baca juga: Si Palui: Ganti Rugi

Baca juga: Si Palui: Hilim Satandar

"Disariki kanapa ikam? Guru nang mana nang katuju manyariki ikam?" ujar Palui panas.

"Dangari dahulu kisahnya abahnya ai, jangan langsung manyalahakan gurunya," ujar nang bini manyabari. "Kisahakan nak, kanapa jadi guru ikam sarik," ujar bini Palui.

"Ulun dipadahi sidin mambunuh Ken Arok. Padahal ulun kada kanal lawan Ken Arok tu," ujar nang anak sambil managis.

"Iya kalu umanya, dasar gurunya kalu nang mangalilu. Anak kita patuh haja kada lawan Ken Arok, dipadahi mambunuh pulang. Timbul kaena bubuhan polisi kasinian," ujar Palui pina mahahing.