Takutan Dimatii

WAYAH ini dunia saraba canggih sudah. Kalau dahulu urang batalipunan bilang ngalih banar wayah ini sutil banar. Handak manalipun kuwitan nang jauh di kampung tinggal kaluarakan haja hinpun matan salawar.

Tukang sayur, tukang iwak, wan tukang nang lainnya gin wayah ini bahinpun samunyaan. Buhan ibu-ibu nang handak bapasan sayur atawa iwak tinggal bapasan di hinpun haja, isuk dibawaakan am. Mun kada handak batalipun picik is-im-is haja. Sutil banar.

Kananakan nang masih sakulah SD gin wayah ini bahinpunan jua. Tamasuk anak Palui nang pahalusnya, masih kalas 1 SD maka batangsa minta tukarakan hinpun. Baguling-guling di tanah minta tukarakan.

"Amun kada manukarakan ulun kada handak sakulah lagi," ujar Utuh maancam kuwitan. Ham, labar am ujar Palui.

Tuhuk dibibisai kada igul-igul jua Utuh tu. Tatap karas ampun inya jua, minta tukarakan hinpun nang bakamira ha pulang. Nyaman bakudakan wan kakawanan jar.

Alhasil, tatukarakan jua Palui. Imbah itu, hinpun bilang kada sing lapasan pada tangan Utuh, ka sana ka mari dibawanya, sampai bahira hinpun dibawanya jua.

"Kaina ngalih abahnya ai. Kalu pina kada balajar lagi, haur maudak hinpun haja inya kaina tu," ujar bini Palui.

"Lihatakannya dahulu. Paling satumat kamaruknya, imbah itu ampih ai inya maudak hinpun.

Rahat malam Jumahat, Utuh umpat sumbahyang Isya ka langgar. Biasanya imbah sumbahyang Isya inya umpat ka urang bayasinan di kampung wan kakawalannya. Amun abahnya, takana nangapakah malam tu sumbahyang di rumah haja.

Balum tuntungan urang sumbahyangan di langgar Utuh lancing bukah bulik ka rumah. Balum sampai, Utuh bakuciak minta tulung sing nyaringan, langsung masuk ka dalam rumah. Hingal-hingal ha hinaknya rahat masuk ka rumah tu, muhanya pucat.

"Hau, kanapa ikam Tuh, kaya disasahi hantu dundun haja. Kanapa?" ujar bini Palui batakun.

"Nah ma. Piyan haja pakai hinpun ulun ni. Ulun kada handak lagi mamakai hinpun. Mambari takutan banar ma ai. Pukuknya ulun kada handak bahinpun lagi," ujar Utuh sambil maunjuk hinpun.

"Kanapa jadi kada handak bahinpun lagi. Maka ikam sumalam batagih bahimat. Imbah ditukarakan maka kada handak lagi mamakai," ujar Palui manyahuti.

"Tadi rahat handak sumbahyang Isya bajamaah di langgar ulun mandangar imamnya baucap. Pukuknya mambari takutan banar bah ai ujar sidin tu," ujarnya pulang.

"Baucap kaya apa garang?" ujar Palui panasaran.