Si Palui : Prakiraan Cuaca

BANJARMASINPOST.CO.ID - HANDAK sabulanan ini cuaca bilang kada manantu. Nang kalihatan pina tarang, kada tahunya mandagui turun hujan saling labatan ditambah pulang angin sing kancangan. Nangkaya itu jua hanyar haja turun hujan saling labatan, sakalinya imbah itu panasnya manggantang sampai manyalingit.

“Ramalan cuaca wayah ini banyak luputnya Mak ai,” ujar Garbus.

“Wajar haja Bus ai, ngarannya haja ramalan,” ujar Tulamak.

“Bujur haja ramalan tapi ramalannya mamakai hitungan ilmu pasti,” ujar Garbus.

“Wayah ini nang pasti pun bisa jua kada pasti dan sabaliknya nang kada pasti bisa jadi pasti,” balas Tulamak.

“Panderan ikam itu sudah manyimpang Mak ai,” ujar Garbus.

“Manyimpang ka mana Bus?” ujar Tulamak.

“Panderan ikam itu sudah manyimpang ka pulitik Mak ai,” ujar Garbus.

“Ikam badua ini pamulaan kudangar mamander ramalan cuaca lalu bapindah ka pulitik, napa hubungannya?” ujar Palui.

“Hubungannya adalah ketidakpastian. Wayah ini adalah zaman ketidakpastian,” ujar Garbus.

“Napa cuntuhnya Bus?” ujar Palui.

“Tadi Tulamak mamander bahwa di bidang pulitik itu nang pasti bisa kada jadi dan sebaliknya nang kada pasti bisa jadi. Artinya nang basalah karna korupsi bisa salamat, sebaiknya nang kada salah bisa dituduh macam-macam,” ujar Garbus.

“Aku akur banar pandapat ikam badua ini Bus ai. Kaadaan kita wayah ini pas banar ibarat ramalan tadi. Tapi kada sekadar ramalan haja karna manurut bubuhan jawatan pengamat cuaca bahwa ramalan itu istilahnya adalah ‘prakiraan cuaca’ jadi kira-kira nang diperkirakan maka artinya kada kawa dipastiakan. Jadi bisa ya dan bisa jua kada. Makanya pas banar kalu tadi Tulamak mamadahakan bahwa prakiraan ini sama wan prakiraan pulitik saraba kada kawa ditangguh. Nang asal pina rami basengkengan sakalinya badamai liwat partamuan 12 manit, nang jalas-jalas kurupsi sakalinya dibibasakan,” ujar Palui pina saraba tahu.

“Umai Lui haratnya ikam pina saraba tahu,” ujar Tulamak.

“Saya kan angguta lepas KPK!” ujar Palui pina mingar hidung.

“Bujur haja.. tapi angguta KPK alias Kalumpuk Paujekan Kalurahan nang rancak mangkal dimuka kalurahan,” ujar Garbus manawaakan. (banjarmasinpost.co.id/mht/rep)