Palui Kapir

KAYA hari-hari biasanya bubuhan panakawan Palui, Garbus, Tuhirang wan Tulamak saban kamarian dudukan di gardu parak warung pakacil Isul sambil mahadang Magrib. Sambil dudukan itu lalu kaluarlah kisah macam-macam nang dialaminya hari itu disamping bahalma wan bacacapatian.

Tapi sudah talu hari ini Palui kada kalihatan bagabung wan kakawalannya, lalu ada nang managguh bahwa Palui musti garing karna kada mangaluar.

“Baiknya isuk kita sabarataan mailangi Palui kalu inya bujur-bujur garing karna biasanya kada sampai manalu hari pasti kalihatan hidungnya,” ujar Garbus.

“Aku akur, isuk kita ilangi jangan kada ingat mambawa pancukan kaya kadundung, pisang manggala wan asam palipisan supaya tabuka liurnya,” sahut Tulamak.

Isuknya imbah barunding lalu bubuhannya tulakan, tapi balum sampai ka rumah Palui batamuan wan Utuh Dugal lalu inya batakun : “Uuuii.. dangsanak Utuh Dugal, bujurkah kawal kita si Palui garing karna sudah babarapa hari ini kada kalihatan?” ujar Garbus.

“Naaahhhh..... itu nang jadi pikiran kami disini, ujar habar Palui “masuk kapir” sahut Utuh Dugal.

“Ah jangan bagaya, bujur-bujurlah bapander Utuh Dugal ai karna kalu kapir itu artinya manyupanakan kampung kita. Apalagi si Palui tamasuk urang nang kita hurmati karna inya sawat jua sakulah di pasantren, banyak tahu ilmu agama,” ujar Tulamak.

“Kita tahu kalu kapir itu artinya murtad, dusa ganal bagi ummat kita. Jadi anih banar kalu Palui nang sudah kuat agamanya lalu masuk kapir. Kalu kaya itu kita tulakan ka wadah Pambakal wan ka rumah Haji Duraup mahabarakan kajadian ini karna kalu bujur manyupanakan kita sa kampungan,” ujar Garbus sarik.

Wayah bubuhannya mangincang bajalan ka rumah Pambakal, batamuan wan bini Palui, lalu langsung haja bubuhannya batakun : “Uiii bini Palui, manyupanakan banar habar itu,” ujar Garbus.

“Habar napa?” sahut bini Palui kabingungan malihat Garbus wan kakawalannya pina manyanyarik.

“Bujur-bujur talalu kalu Palui masuk kapir, apalagi inya urang tapandang di sini,” ujar Tulamak.

“Sabar Bus, sabar Mak, Palui kapir itu suruhan abahku jua,” ujar bini Palui.

“Nah..... ini makin katarlaluan lagi maka sampai mintuhanya nang manyuruh kapir,” sahut Garbus. “Kalu kaya itu kami kada bakawan lagi, putus hubungan kakaluargaan kita,” ujarnya sabarataan.

“Astagfirullah.....basabar lah sabarataan jangan lakas sarik, kaya ininah kisahnya,” ujar bini Palui lamah lambut.

“Lakiku itu disuruh abah kapir gasan managih hutang karna banyak urang sana nang maambil barang wan abahku. Abahku kada kawa karna sidin gagaringan. Lalu Palui disuruh sidin kapir, imbah itu isuknya langsung batarus ka Rantau karna ada undangan mamarinanya nang bakakawinan minggu ini, nang habarnya mandapat minantu urang Ujung Pandang,” ujar bini Palui bakisah.

“Ooooooo........jadi Palui disuruh kapir, ka proyek PIR alias Parkabunan Inti Rakyat di Binuang, Tambarangan,” ujar Garbus manyahuti sambil maurut dada karna salah kira, lalu langsung samunyaan basalaman wan bini Palui.

“Maafakanlah kami sabarataan, kami tamasuk urang nang badosa karna mamadahakan nang kada bujur,” ujar bubuhannya. (rep)