Si Palui: Gambar Sama

DALAM rangka Ujian Nasional tingkat SMP/MTs maka tarutama pasarta didik kalas 9 nang handak ujian wajib bagambar pas futu.

”Ne ulun manarusakan pasan kapala sakulah agar saluruh paserta didik kalas 9 tanpa kacuali wajib bagambar pas futu ukuran 3x4 cm, hari isuk datang tukang kudaknya ka sakulahan, jadi nang rambut gondrong digunting dahulu kamarian ne di rumah, sabalum kami nang mangutal-ngutalnya kena,” ujar Palui bapapadah.

“Barapa saikung babayar Pak Palui?” Garbus paman sakulahan manyurung tatakunan pas mandangar inya.

“Parlu dibaritahukan bagambar gasan ujian itu peray alias gratis,” lakas Palui manyahuti.

Salain manyiapkan gasan ujian nasional di sakulahan, Palui sibuk pula manyiapkan gasan tryout sabagai ajang uji cuba paserta didik tarhadap mata palajaran nang sudah diterimanya salama ini. “Babarapa hari lagi akan digalar tryout buhan murid lah, ulih karana itu buhan ikam bujur-bujur balajar di sakulahan wan di rumah, jangan bamain playstation haja, atau main game di warnet,” kepsek bapapadah pada upacara apel Sanayan baisukan ka murid-murid.

“Pak minta kunci jawabannya haja, Pak?” ucap salah satu murid Utuh Halus.

“Bah ikam si Utuh ne kaya apa mental ikam Utuh Halus. Himpadal halus balum apa-apa sudah manyarah, ada apa lalu ya te?” kepsek pina habang muha sidin.

“Jawab bujur-bujur murid-murid ai seluruh soal tryout ya, itu pasti sudah dipelajari ulih buhan ikam, kacuali ha dasar pambabal makalahan am kada ingat lagi wan palajarannya,” Palui umpat bapander.

Sampai saatnya bagambaran karana tukang kudaknya datang ka sakulahan. Singkat kesah sudah tuntung gambarnya dibasuhakan ulih tukang kudak jadi diitihi ulih kepsek satu persatu gambar pas futu murid-murid kalas 9 nitu.

”Napa Lui gambar sama persis, padahal urangnya lain kalu saikung? Rahman wan Rahmin, si Rahman urangnya tahirang ada ne sama putihnya wan Rahmin, iyakah…?” ujar kepsek bingung.

“Nah ikam dasar gambarnya sama persis, bingung kena maandak gambar di meja paserta ujian, dikira urang dua numur ujian tapi nang manjawab saikung haja,” Palui jua bingung.

Dipanggil Rahman wan Rahmin kanapa bujurkah inya ne badua sama putihnya. Sakalinya si Rahman tahirang urangnya, si Rahmin taputih awaknya, tapi digambar badudua sama putihnya? Kaya apa ne… Sakalinya salidik punya salidik , tukang kudak bisa maedit futu sahingga awak hirang bisa jadi putih, makalahan am sama persis muhanya jua putih. Rupa muhanya sama, hidung sama mancungnya, karana inya badua kambar , jadi nang mambedaakan salama ne di kalangan guru wan murid adalah si Rahman tahirang muhanya, si Rahmin taputih muhanya itu.

”Baasa bagambarlah terutama si Rahman jangan diedit-edit lagi , supaya kita kawa mambedakaannya?” ujar kepsek sarius, lihum Palui wan tukang kudaknya.

“Siap Pak Kepsek?” ujar tukang kudak.

“Asa nyaman nah aku bahinak, karana masalah kawa dipacahakan,” sahut Palui.

Limbah dikudak napa si Rahman takintip, jadi baasa pula dikudak sampai ampih takintip wan lihum sadikitlah asal jangan kaluar gigi haja lihumnya, atur tukang kudak, tatawa kepsek wan Palui pula. (aan maulana/anggota Dewan Kesenian HSS)