Si Palui: Teknik Sipil
“Bagawi dimana wayah ne Lui? Panampilan kaya urang sugih jua, baisi mutur, bini bungas,” takun Garbus.
lihat foto
BIARPUN hanya tamat SMP, tapi penampilan Palui necis, apalagi lawas bagana di Banjar, datang ka hulu sungai kawa baagak wan urang-urang di kampung.
“Bagawi dimana wayah ne Lui? Panampilan kaya urang sugih jua, baisi mutur, bini bungas,” takun Garbus.
“Akukah bagawi di teknik sipil,” sahut Palui lihum.
“Oh jadi lulusan buhan sarjana teknik juakah?” takun Tulamak jua.
“Kena ikam tahu haja kesahnya,” Palui takurihing.
Hari Jumahat sabulan atau dua bulan sakali, Palui bulik ka hulu sungai jiarah ka kubur aruah mama, abah,paninian, mamarina nang sudah lawas maninggal dunia. Kaya apa sibuknya disampatakan ulih Palui bajiarah ka kubur di hulu sungai. Pas takana ada baduit kawa marental mutur, jadi panampilan kaya urang baduit jua bulik ka kampung halaman.
Dua hari kemudian hari Ahad baisukan Tulamak wan Garbus tulakan ka Banjar basapida mutur, handak tahu bujurkah Palui wayah ne bagawi di teknik sipil. Buhannya mandapati Pamman Juwai nang bagawi di dinas PU Banjar sana. Sidin bakula wan Tulamak.
”Oh Paman Juwai kami jauh-jauh datang ka Banjar, handak bajalanan salajur batakun bujurkah Palui bagawi di teknik sipil, ujarnya?” takun Tulamak ka Paman Juwai.
“Pas haja Mak ai, tatakunan ikam ne, Palui bagawi di teknik sipil nitu yakni manggawiakan bangunanku, aku baulah ruko, Palui kapala tukangnya, jadi umpat jua inya baaduk samin wan pasir, kada bakacak pinggang haja inya maski sudah sabagai kapala tukang,” tatawa Paman Juwai.
“Dimana paman andaknya ruko pian nitu?” takun Garbus pula.
“Andaknya di Banua Anyar, kita nah umpat aku haja bamutur,” tawar Paman Juwai.
Rami buhannya dibawa Paman Juwai ka Banua Anyar malihati bangunan ruko sidin.
”Lui siapa naya nang badua ne?” ujar sidin bagaya.
“Han jarku tahu ja kalu kena kesahnya, aku begawi di teknik sipil, sebab kalau kada baisian ilmu teknik sipil ne kada mampu baulah roku naya? Aku diparcaya Paman Juwai nah jadi kapala tukangnya,” Palui himung ka buhannya.
“Ayuha Lui ai, kami umpat bagawi nah, nyaman kawa manukar pabukaan puasa wadai wan masakan nang nyaman-nyaman, kaya ikam jua,” sahut Tulamak mahiba.
