Si Palui: Handak Tulak Madam

PALUI lawan si Garbus ni salain bakawal tumatan hahalusan inya jua baangkatan dangsanak. Kamana haja tulak musti badua. Babisnis jar urang wayahini musti badua jua. Kada sing pisahan, pendek kata samuak saliur tupang, sakit sama sakit nyaman sama nyaman.

Cuma inya badua ni bausaha sudah tuhuk banar. Apa nang jar urang musti digawi umpat jua, baharaguan iwak dalam karamba umpat jua, maulah bata nang kaya urang wayahini umpat jua. Pendeknya apa nang jar urang pina patut musti inya badua kada katinggalan.

“Tapi memang balum wayahnya jua kalu,” jar Palui bepander lawan Garbus.

“Kita ni sudah macam-macam gawian, tapi kadada nang cocoknya sabuting-buting. Jangan handak untung, ini aur mahitungi nang ruginya haja,” jarnya. Sugih haja lagi balum marasai, mun sakit tu dasar pina tatarusan.

Lui, jar Garbus, kaya apa amun kita madam, tinggalakan ja Banua ni. Apa amun mancari duit, jangan lima ratus, saratus asa ngalih banar. “Madam kamana Bus,” jar Palui batakun maanyaki.

“Barang ai kita, ka Sampitkah. Ujar bubuhannya pina nyaman di sana,” jar Garbus.

“Amun kita madam kasana napa nang cagar digawi?” takun Palui.

“Barang haja inya cucuk haja amun ditulaki ujarti mandulang amas rami banar, mun kada umpat batabang kayukah,” jar Garbus.

Amun handak madam ka Banua urang Bus ai, jar Palui mamadahi, jangan nasi haja dalam parut, musti baisi.
“Baisi nangapa,” jar Garbus.

“Musti bakajian supaya jangan manyupanakan Banua,” jar Palui.

“Kajian nangapa,” jar Garbus maanyaki.

“Kajian taguh lawan gancang, sualnya amun madam ka Banua urang tu, kalu kahabisan duit bajual tungkihan barang, dari pada kada makan atau maambil upah maangkat motor satum nang tapatak ka dalam lucakkah, amun ada baisian ilmu gancang,” ujar Palui.

Aku ni akur haja,” jar Garbus. “Tapi nang kaya apa kita mancari kajiannya, aku ada pang kuitan dahulu di Gunung Ampah Kamawangi sana, tapi sidin sudah mati. Tapi aku ingat haja pang pasan sidin tu, untalankah,” jar Garbus.

Kada, jar Palui, pulang manyahuti. Aku mun untalan cagar mati batingkaung. Kadaam aku, biar ja aku manunggu Banua ja, kada usah madam.

Kada, untalan balampah masuk ka dalam hutan. “Cuma ada syaratnya musti batalanjang kada bulih ada sabilah banang nang barikit di awak,” jar Garbus.