Si Palui: Cobai Dulu

BANJARMASINPOST.CO.ID - KADA karasaan bubuhan kakanakan sakulah bananaikan pulang. Karna bininya sibuk baharaguan di rumah, tapaksa Palui nang manulaki maambilakan rapor wan tabungan anaknya nang bangaran si Pulai.

Imbah maambilakan rapor wan tabungan anaknya itu Palui langsung mambawai anaknya ngitu bulik.

“Bah duit tabungan handak ulun tukarakan baju sakulah,” ujar si Pulai. “Ayuha amun duit tabungan ikam ngitu handak ikam tukarakan ka baju,” ujar palui.

“Tapi kada usah gin diganii ka pasar, ulun bisa haja tulak saurangan bah ai,” ujar Pulai.

“Ayuha ikam saurangan, tapi hati-hati di jalanan.

Tulak ai si Pulai saurangan ka pasar. Di pasar si Pulai masuk ka tuku baju, langsung ai inya mamilih baju sakulah nang bagus. Limbah babayar, bulik inya ka rumah.

“Lai ui Pulai, kasini satumat," ujar Palui mangiyau anaknya. "Cuba pang abah handak malihat baju nang nang ikam tukar,” ujar Palui. Langsung ai Pulai maambil bajunya tukarannya.

"Cubai puruk pang nak, abah handak malihat," ujar Palui manyuruh anaknya.

“Hau…kanapa maka kaganalan, kada ikam cubai kah tadi pas dituku nya?” ujar Palui pina bingung.

“Kada pang bah ai,” ujar Pulai.

“Makanya urang dicuba dahulu sabalum ditukar. Amun tadi dicuba maka kada bataha kaganalan pang,” ujar Palui.

Kamariannya wayah si Palui handak baruku, pas mancari korek api sakalinya habis. “Aduh, kada kawa nah aku baruku, korek api habis,” ujar Palui.

“Lai kasini pang satumat nah, abah ada tugas gasan ikam,” ujar Palui mangiyau pulang ka anaknya.

“Tugas napa garang bah maka kukuciak bakiyau ulun?” ujar Pulai.

“Tukarakan abah korek di warung subalah, abah kahabisan korek handak baruku. Ini nah duitnya, tukarakan sa-pak,” ujar Palui sambil manjulung duit lima ribu.