Si Palui : Hayam Saungan

BANJARMASINPOST.CO.ID - Buhuhan Palui imbah mulai ganalan sampai babinian kasukaannya paling katuju manyaung hayam, sama katujunya wayah lagi halus basaung jangkrik.

Hayam jagaunya dibari umpan nang mamburangsang, bahanu dibari makani lipas atawa cacak.

Saban baisukan wan kamarian dimandi’i wan dibanyui supaya awaknya barasih, kawa badiri cagat bisa batangkook nyaring sambil diunjai supaya sikap manyambar.

“Kaya apa hayam jagau ikam Bus maka pina suyuk banar, amun pina suyuk jangan disaung kaina mambuang taruh haja,” ujar Palui.

• Keraton Sejagat Bikin Kostum Buatan Rini Viral, Fanni Ingin Seragam seperti Kerajaan Brunei

• Tolak Uji Materi UU KPK, Mahkamah Konstitusi Ungkap Alasan Ini

• Asal Virus Corona Terungkap, Peneliti China Sebut Dari Tempat Ini

• Dua Konsultan Sumur Bor Pemadaman Kebakaran Lahan Dijebloskan ke Rutan Palangkaraya Kalteng

“Mungkin tasalah pamakan maka pina mencret tarus bahiraan,” sahut Garbus.

“Kalu hayamku makin hari makin burangsang makanya aku siap basaung wan hayam, siapa haja tamasuk hayam Tulamak wan hayam Tuhirang nang dipadahakan disuntik wan vitamin B-12,” ujar Palui. “Dalam samingguan ini hayamku kada kuguringakan di kandang lagi tapi sudah kubawa naik ka rumah supaya kada kadinginan.”

“Kaya apa bini ikam kada sariklah, karna hayam jagauku kuharagu kaya itu jua tapi lalu mencret bahiraan. Kukira dibari makaninya lumbuk parawit bacampur sahang batutuk lalu parutnya kapanasan sampai bahiraan incir kaya banyu,” ujar Garbus.

“Sama haja Bus ai wan biniku panyarikan jua, tapi aku sudah bajanji wan inya bila kaina manang bataruh duitnya kubagi dua,” ujar Palui.

Rupanya bini Palui umpat mandangarakan panderannya badua lalu baucap :

“Tarancak kalah pada manangnya, balum tarasani kawa manukar galang amas duit pamanang basaung hayam, bahkan tabanyak ungkusnya gasan manukar umpan,” ujar bini Palui bakakajutan.

“Jangan hawatir ding ai,” ujar Palui.

“Sakali ini kita pasti manang karna aku sudah mandapat firasat, sudah bamimpi naik gunung bagandingan tangan wan ikam. Basiap-siaplah isuk hari ahad kita tulakan ka pasar amas,” ujar Palui.

Baisukannya, Palui sawat bangun lalu mandi basiap-siap handak tulak manyaung hayam. Nang bini sibuk di dapur bamamasak gasan makanan baisukan karna biasanya bila basaung hayam itu sampai bahaharian hanyar bulikan.

“Sudah siapkah ding makanannya,” ujar Palui.

“Ayu ja makan badahulu, dibawah tutudung sudah kusiapakan makanan kasukaan sampiyan,” sahut nang bini.