Si Palui : Masuk Tantara

BANJARMASINPOST.CO.ID - UTUH, anak Palui nang pahalusnya sudah talu tahun ni haur kalas satu aja. Kada lain pang lawan nang abah, anak Palui nangini sama ja pada pambabal sampai titir kada naik kalas.

Tagal, Utuh tu anak nang taat wan babakti lawan kuwitan. Napa ja disuruh atawa dipasani kuwitan, karap digawi wan diingatakannya. Biar pun hasilnya gin rancak jua maulah kawitannya ngalu saurangan maraga salah pamahaman.

“Putungan awak pina ganal wan nahap. Cucuk banar bila ikam kaina masuk tantara,” ujar Palui mamandiri Utuh.

“Inggih, Bah ai. Ulun kaina masuk tantara haja. Palihat ulun buhan tantara tu gagah banar, apalagi bila mambawa sanjata atawa badil,” sahut Utuh kahimungan.

“Tapi ikam harus pintar, Nak ai. Sakulah tu bujur-bujur jangan diulah baramian haja. Awak jua dijaga kasihatannya. Jangan banyak makan parmin karna maulah rusak gigi,” ujar Palui.

“Imbah pang, mun gigi rusak kada kawalah masuk tantara? Maka tantara tu babadil, kada pacangan bagugut?” sahut Utuh.

“Sudah gin, Nak ai. Guring ja lagi. Aku mauk bila ikam ni mulai banyak batakun. Aku kada pati paham jua nang kaya itu. Isuk sakulah pulang,” ujar Palui manyahuti babarang.

Mandangar abahnya mulai manggarunum, Utuh bapirusut ka kamar sambil mamikirakan masuk tantara nang kaya dipasani abahnya tadi. Batangah malaman inya hanyar kawa taguring mambayangakan tantara nang dikatujui.

Isuk harinya, Utuh bulik sakulah tasungsung pada biasanya. Sapanjang jalan inya manangis sambil bukah handak mancari abahnya.

“Kanapa maka ikam bulik sungsung sambil manangis? Ikam sihat ja kalu? Kadada balukaan atawa tarumpak sapida mutur kalu?” ujar Palui galagapan malihat nang anak bulik ka rumah manggaraung balilihan banyu mata.

“Ulun disariki guru di sakulahan tadi. Makanya ulun bulik karna takutan kalu kaina dipadahakan kada manurut kawitan,” ujarnya manyahuti abahnya.

“Manuruti kawitan tu kawajiban, Nak ai. Kada bulih guru manyariki bila murid handak taat wan patuh lawan kawitannya. Kanapa garang jadi guru ikam maka kaya itu?” ujar Palui mulai sangit.

“Tadi rahat palajaran agama, guru ulun manakuni siapa yang handak masuk surga. Barataan kakawanan di kalas menjawab handak, tapi ulun ja nang kada hakun,” ujar Utuh basisigan.

“Imbah tu pang, ikam tatap haja lah ditakuni wan disuruh manjawab?” ujar Palui.

“Tatap ai ulun jawab kada hakun. Sampai guru manakuni ulun pulang, handak masuk naraka kah ikam maka kada hakun ka surga? Sakit hati ulun ditakuni kaya itu, Bah ai,” ujar Utuh pulang.