Bapanyakit Hati

DI antara kakawalannya, Palui tamasuk urang nang paling nyaman hidup. Karna rumah kada manyiwa, baras, iwak, gula, uyah wan asam kada manukar, ditambah pulang bini langkar. Oleh karna itu banyak kakawalannya nang bahiri wan kahidupan Palui. Aku ini dipandang haja sanang hidup, tapi hati rasa dikarukut bidawang saribu, ujar Palui.

Hau, kanapa maka kaya itu Lui? ujar Garbus.Maklum haja hidupku ini sugih umpat mintuha, ujar Palui.

Biar umpat mintuha kada jadi sual, dibanding aku ini nang pas-pasan dicari sahari dimakan sahari, ujar Garbus.

Si Garbus masih untung kalu dicari dimakan sahari, tapi aku ini sampai tatumpang- tumpang hutang, ujar Tuhalus umpat jua menyurung pandir.

Bubuhan ikam jangan talalu mamuji, karna aku ini muha haja nang lihum tapi hati manangis, ujar Palui.

Jangan ditangisi Lui ai, mustinya disyukuri, ujar Tulamak

Aku ini kalihatannya haja sanang tapi sabujurnya aku garing, makanya aku bulang bulik ka duktur, ujar Palui.

Garing napa Lui Lui? ujar Garbus.

Samalam aku ka manteri kasihatan lalu disuruhnya ka puskesmas kalu parlu ka dukter spesialis, sahut Palui.

Ooooo.. ikam kana panyakit dalam pulang kah Lui? ujar Garbus.

Imbah kukisahakan wan manteri lalu dipadahakannya panyakitku adalah panyakit urang banyak yaitu panyakit
hati. Tapi biarpun kana panyakit hati awakku kada kuning, ujar Palui.

Kalu kaya itu lakasi baubat sabalum talambat dan sabalum manjangkit wan kami, ujar Tulamak manyuruh.

Samalam jua aku sudah ka dukter dan sudah jua ka laboraturium, ujar Palui.

Kaya apa hasilnya Lui, apakah bujur ikam kana panyakit liver? ujar Garbus.

Malah duktur tatawa malihat hasil ronsenku, ujar Palui.