Tasbih Pagat

AKHIRNYA Palui tahun ini tadi kawa jua malihat Makah walaupun cuma haji turis alias baumrah lain bahaji. Itu gin amun kada dapat warisan matan pakayiannya. Amun mangumpulakan duit tunggal dikitan, bisa sampai habis umur kada tulak-tulak.

Imbah parak satangah bulan di Tanah Suci manunaiakan ibadah umrah, ahirnya Palui bulik jua ka banua. Banyak kisah nang dibawanya matan sana.

“Kami basyukur banar ikam sihat wal afiat haja, kadada garing salawas di Tanah Suci,” ujar Garbus.

“Mudahan ikam jadi haji bujur kaina Lui, jadi kawa batambah H di muka ngaran ikam” sambung Tulamak umpat mandoakan.

“Alhamdulillah barakat doa dan barakat sangu ikam sabarataan,” sahut Palui. “Ngaran haji itu terlatak pada parbuatan dan tingkah laku sahari-hari Mak ai, sebab kadada artinya ngaran batambah haji tapi kalakuannya makin mambala-bala,” ujar Palui.

“Kalu kalakuan kada baubah dan makin mambalabala itu ngarannya haji mardut,” ujar Tulamak.

“Ayu dinginum banyu zamzam dan makani kurmanya,” ujar Palui manyuruh.

“Aku sudah jua manginum zamzamnya dan mamakan sabigi kurmanya,” ujar Garbus.

“Ayu ja habisakan samunyaan kurmanya,” ujar Palui manyuruh.

“Kalu kawa sisanya itu handak kubawa bulik, mamintaakan gasan bini, biniku paharatan mangidam,” ujar Tulamak babisik.

Imbah manyuruh itu Palui masuk ka dalam, lalu mambungkusakan kurma wan kacang arab lansung manjulung ka anu Tulamak.

“Bagianku mana Lui?” ujar Garbus batakun imbah inya malihat Tulamak mandapat bungkusan

“Ikam ini nah... kubari tasbih supaya lawas pahalanya,” ujar Palui.

“Tarimakasihlah Lui, tapi ampun maaf banar karna biasanya katikan tasbihku pamagat,” ujar Garbus.

“Insya Allah kada pamagat Bus ai karna tasbih ini ulahan Turki tali tasbihnya kuat banar karna banang nilonnya balapis-lapis,” ujar Palui.

“Bujur Lui, dahulu aku biasa jua dibari tasbih tulang unta kada kawas mamakai pagat,” ujar Garbus.

“Tasbih ini biar pagat kada ngalih manyusunnya Bus ai karna biginya ganal-ganal dan hitungannya cuma 33 bigi, nyaman dibawa kamana-mana,” ujar Palui.

“Ngalih Lui ai, katikan tasbihnya rancak pagat,” ujar Garbus.

“Ikam kada paham banar ucapan Garbus itu,” ujar Tulamak. “Tarus tarang haja Lui ai, tasbihku pamagat itu kada karna pagat talinya tapi pagat mangatiknya, ada nang tamandak sampai babarapa hari bahkan sampai samingguan pagat mangatik tasbih,” ujar Garbus mangakui.

“ Ooooo... jadi ikam bamingu-minggu kada batasbihlah Bus?” ujar Palui batakun.

“Tabungkar rahasia Garbus, karna bila kada mangatik tasbih baarti inya kada sambahyang Lui ai,” ujar Tulamak mamacahakan maksud tasbihnya Garbus pagat. (tam)