Karung Paling Ganal

AMUN pas kadada gawian Palui sapakawalan biasanya maiisi waktu lawan batatangguhan. Kaya tangah hari samalam, rahat istirahat bagawian Palui mambawai kakawalannya batangguhan.

“Kita batangguhan haja nah. Tagal tatangguhan kita ni kada bulih kada babuat karung,” ujar Palui mambuka pandir. Garbus wan Tulamak lalu mamikirakan ai tatangguhan nang cagar disurung.

Garbus mamulai tatangguhan. “Karung apa nah nang bandanya halus, wan samuaan urang baisian,” ujar Garbus manyurung. Hinip Palui wan Tulamak mamikirakan.

Kada lawas imbah itu, Tulamak maangkat tangan sambil baucap. “Bah, sutil banar tatakunan ikam Bus ai. Karung nang ikam maksud tu karungkungan kalu?” ujar Tulamak sambil baangkat dagu rasa manang banar. Garbus lalu masam ha muhanya dipakalah Tulamak.

“Ni giliran aku pulang. Karung napa nang kada kawa dipingkuti” ujar Tulamak.

Balum sawat tuntung, Garbus langsung mangalakak tatawa, manawaakan tatakunan Tulamak.

“Kananakan gin tahu kalau jawabannya bingkarungan Mak ai. Cari nang pina ngalih pang tatakunan tu,” ujar Garbus maangsul Tulamak.

Palui lucut manawaakan kakawalannya bahual. Apalagi malihat Tulamak nang bagaru kapala dipakalah Garbus.

“Nah, buhan ikam badua ni pikirakan tatangguhanku ni nah. Karung siapa nang paling ganal di dunia?” ujar Palui.

“Karung raksasa!” ujar Garbus wan Tulamak tapaimbai manyahuti.

“Salah!” ujar Palui. Sapuluh manit labih buhannya mamikirakan karung siapa nang paling ganal. Palui kurihing-kurihing saurangan malihat muha kakawalannya nang mamikirakan tatangguhannya.

“Gung. napa jawabannya Lui?” ujar Tulamak manyarah.

“Handak tahu kah?” Karung nang paling ganal tu karung ampun Columbus,” ujar Palui sambil kurihing-kurihing.

“Hau. Siapa Columbus tu? Kanapa bisa karung inya nang paling ganal?” ujar Tulamak panasaran.

“Buhan ikam ni kada ingat wan palajaran rahat kita di isdi bahari. Ibu guru ada kalu mangisahakan Columbus nang mangulilingi dunia? Ujar sidin Columbus mangarungi lautan. Han, lautan haja kawa dikarunginya, pasti ganal banar karung Columbus tu,” ujar Palui pina musti.

Tulamak unggut-unggut mandangarakan. Mandangar jawaban Palui, Garbus langsung manyayarik.

“Bahapal Palui ni. Mangarungi lautan nang ujar guru tu kadanya mambuat lautan ka karung pang, tapi manjalajahi lautan!” ucap Garbus kasasarikan. Tulamak bingung mandangar kakawalannya kaya itu.

“Nang mana nang bujur ni?” ujar Tulamak batakun.

“Utak ikam nang lumbus Mak ai, dibunguli Palui hakun haja,” ujar Garbus sambil manciling malihati Tulamak.

“Iya kah Lui,” ujar Tulamak nang masih pina bingung.

“Iih, bujur ujar Garbus tadi Mak ai,” ucap Palui

“Nang mana Lui? Nang manjalajahi tadi kah?” ujar Tulamak pulang.

“Kada, utak ikam lumbus Mak ai!” ujar Garbus banyaring di higa talinga Tulamak.

“Iya, baisi kawal pina kada samparaka. Saikung kapintaran, saikungnya liwar pintarnya!” ujar Garbus makin sarik. Palui lucut tatawa. Tulamak nang masih kada mangarti umpat jua mangalakak tatawa. (ofy)