Tang...

“NAPA dipikirakan Mak maka gagarunuman saurang?” ujar Palui wayah bubuhannya badudukan di gardu runda.

“Sakalinya bahasa Banjar kita ini ngalih-ngalih nyaman Lui lah,” ujar Tulamak.

“Napa contohnya nang ngalih-ngalih nyaman itu Mak?” ujar Palui.

“Matan samalam aku tuhuk mamikirakan sual tatakunan anakku. Anakku itu batakun sual sambatannya dalam bahasa Banjar kalu ada kajadian nang tiba-tiba atawa mandadak, atawa bakakajutan tajadi.”

“Ooo... kalu Itu gampang haja, sutil banar Mak ai,” ujar Gabus umpat manyala.

“Ikam bisa manyambat kata ‘langsung limbah itu’, atawa ‘sakonyong-konyongnya’.

Umpamanya tarjadi hujan deras, langsung limbah itu petir halilintar manyambar-nyambar, atau sakonyong-konyongnya petir halilintar manyambar-nyambar.”

“Haha... Kata-kata nang ikam sambat itu masih kapanjangan Bus ai. Sabaiknya pakailah kata nang episin,” ujar Palui.

“Episin tu napa Lui?” ujar garbus wan Tulamak tapaimbai.

“Episin itu artinya hemat, singkat wan padat,” ujar Palui pina musti.

“Bah aku tambah bingung Lui ai,” ujar Tulamak.

“Kalu kaya itu nang singkat handap wan padat pada kata ‘langsung’ ai lagi. Mana ada nang handap pada itu, Contohnya tarjadi hujan daras, langsung patir manyambar-nyambar,” ujar Tuhirang nang dari tadi umpat mandangarakan.

“Haha.. aku kira itu masih panjang Rang ai, masih kada episin,” ujar Palui pulang. “Lalu napa jawaban ikam Lui?” ujar bubuhannya bingung mamikirakan.

“Jawabannya sutil banar wal ai” ujar Palui baagak.

“Dalam bahasa Banjar , kita tambahi haja wan kata ‘tang’.

Tapi lain tang nang dipakai gasan mambengkel tu pang. Contohnya: Tang datanglah si Tuhirang, tang datanglah Tulamak, tang tajarungkuplah julak Duraba, tang takantutlah si Garbus kada singhaja lantaran kasakitan parut, bus... bus... buuuuss!”

Maka tang, badaraulah mangalakak bubuhan Palui mandangar kata episin bahasa banjar tadi.

Bubuhan kakawalannya tapaksa maakui kahibatan si Palui, sahingga si Palui tang takarinyum. (aan)