Si Palui: Kantut Basumab

DAMI kaamanan di kampung, katua RT mambari parintah kapada warga supaya jaga malam bagiliran. Palui sapakawalan waktu takumpulan di gardu jaga malam sambil makan jagung bakar wan jaring. Rami banar walaupun malamnya hujan rintik-rintik , kada manyurutakan buhannya turun ka tampat runda di gardu nang sudah disadiakan tv umumnya.

”Aku sadikit haja makannya nah, kena sarik biniku di wc babau banar kamih,” ujar Palui mambuka pander.

“Dahulu dasar bujur, makan jaring bakamih babau lakak di wc,” sahut Garbus.

“Kada banyak sadikit barang makan jaring,” sahut Tulamak.

Rahatan rami makan jagung bakar wan jaring barian ketua RT ka buhan nang jaga runda, ada nang bakantut tapi kada babunyi pang kantutnya. ”Umai nah bau banar siapa nang bakantut?” ujar Palui sambil mamicik ka hidung.

“Kantut basumab, siapa ne nang malempar,” ujar Garbus jua mamicik ka hidung.

“Dasar bau kantut basumab banar nah, siapa nang manembak,” Tulamak baucap.

“Nah jadi kita batitiga kadada nang mangaku saikung pada saikung,” sahut Palui.

Rami buhannya bahual siapa nang bakantut di gardu salain buhannya nang batiga itu. Karana bahual jadi pina rami baricau kaya urang bakalahi haja. Karana galu itu jadi datang katua RT ka gardu.

”Ada apa Lui sapakawalan jadi rami banar baricau, bakalahiankah atau ada sesuatu apa, kadangaran banar ka rumahku,” katua RT batakun ka Palui.

“Ini Pak katua RT ai ada nang manembak wan kantut basumab napang baunya awet hanyar ampih babau,” ujar Palui.

“Sudah itu pang siapa nang bakantut basumab ya,” ujar katua RT batakun pula.

“Kadada nang mangakunya Pak RT ai,” sahut Garbus.

“Ikamkah Tulamak, sambat haja,” katua RT sarius mamandangi ka Tulamak.

“Ulun wani basumpah Pak RT ai bahwa nang bakantut itu kada ulun,” jawab Tulamak pasti.

Katua RT pina habang muha sidin . Kamudian babarapa menit berlalu, ada bini Palui datang ka gardu mandangar pina galu banar jua di gardu itu te.”Ada apa Pak RT?” takun bini Palui.

“Ini ada nang bakantut maka baunya kaya kantut basumab lawas hanyar ampih hilangnya, kadada nang mangakunya,” katua RT manjalasakan.

“Oh damintukah? Itu kabiasaan laki ulun bila bakantut kaya kantut basumab haja baunya lawas hanyar ampih?” bini Palui blak-blakan.

“Nah artinya Palui ya nang bakantut,” ujar katua RT wan Garbus, Tulamak tadarau manyambat Palui nang bakantut. Palui pucat kada kawa lagi bakulim.

“Nah iya pang aku minta maaf buhannyalah. Kada senghaja malapas kantut di hadapan kakawalan nang sadang makan jagung bakar wan jaring nah?” Palui mangaku lakas bulik dua laki bini, kada jadi jaga runda sampai ka subuh. (aan maulana/anggota Dewan Kesenian HSS)