Si Palui: Gaji Bulanan

Lawas-lawas si Palui wani pandudian sampai ka kantor. Kalo inya marasa parlu, bisa ai kada sing turunan. Pamulaan sahari inya kada turun. Bossnya diam aja. Dua hari, diam jua. Labih pada itu, bossnya kada mananagur lawan inya.

Apalagi limbah si palui dapat objekan di luar kantor nang panghasilannya ganal pada gajihnya di kantor bisa sampai sabulanan hanyar inya datang ka kantor. Itu gin tagal kaingatan tanggal satu banar ai, hari gajihan. Jaka kahada, bisa ai saku inya kada sing turunan. Sebab tanggal satu itu duit pang nang didatangi. Hari lain mandatangi gawian banar ai.

Baganti kakawalannya sakantor pulang nang bahira lawan inya. Sakali sabulan hanyar tatamu lawan si Palui. Tabalikan kakawalannya pulang nang manggawi gawian nang mustinya digawi si Palui. Kakawalannya ada nang mangaduakan lawan boss, sebab si Palui kada sing turunan, tapi tatap tarima gajih buta. Bossnya diam aja. Soalnya si Palui rancak datang ka rumah boss. Macam-macam nang dibawaakannya gasan boss. Apalagi kalu objekannya banyak untungnya.

Waktu tanggal satu pulang, si Palui datang guduk-guduk basepeda motor. Kakawalannya nang lain nang sudah lawas dinasnya gin banyak baluman kawa manukar sepeda motor. Banyak kakawalannya manyindir si palui. Sebab si Palui kada heran-heran.

“Nyaman ai, sabulan sakali turun maambil gajih!” Jar kakawalannya.

Didangarakannya aja oleh si Palui. Limbah tuntung inya manandatangani daptar gajih dan mahitung gajih nang ditarimanya, bapandir ai inya sambil batakun, “Aku batakun pang lawan bubuhan ikam ni?”
“Silahakan, silahakan!” jar buhannya.

Di kantor ini gajih itu hariankah atawa bulanan?” takun Palui.

Gajih bulanan Lui ai, amun harian, itu kuli!” jalas saikung kakawanannya.

Nah, artinya kada tasalah tu aku!” ujar Palui pina santai.

“Artinya bujur aja kalu aku datang sabulan sakali maambil gajih. Jaka gajih harian, itu hanyar aku datang saban hari!” ujarnya pulang sambil turun matan kantor bulik ka rumahnya. Marangut kakawalannya. (HYA)