Si Palui: Jalan Pintas

JALANAN di kampung Palui nang hanyar talu bulan dibaiki sakalinya rusak pulang. Banyak luangnya wan aspalnya rumbih kiri-kanan.

"AKU bingung banar Lui ai, kanapa maka jalanan di wadah kita ini lakas banar rusak," ujar Garbus.

"Itulah akibat KKN, balum satahun dibaiki sudah rusak pulang bahkan rusaknya makin babangat," ujar Palui.

"Kalu KKN artinya sudah kawa ditangguh siapa-siapa urangnya," ujar Garbus.

"Kita kada kawa main tuduh kalu kadada buktinya karna wayahini nang panting bukti. Bila kadada bukti biar miliaran pun nang dibantasnya kada kawa dituntut dan kada kawa dihukum. Sudah banyak cuntuhnya, bila diadili, lalu bibas," ujar Palui.

"Jadi kaya apa baiknya Lui?" ujar Garbus.

"Sabujurnya, nang banyak umpat marusak jalanan kita ini adalah mutur-mutur trak nang ganal-ganal ma-angkut batu dan ma-angkut tanah. Kalu jalanan ini hanya sahibar gasan bajalan batis, basapida atawa bagarubak pasti tahan haja ampat lima tahun," ujar Palui.

"Hi-ih, bubuhan supir trak-trak itu nang kada tahu diri, muatannya barat-barat. Mustinya pambakal kada mambulihakan mutur-mutur trak itu masuk kampung kita," ujar Tulamak.

"Baiknya kita demo haja ka kantur pambakal dan ka kantur camat, kalu parlu sampai ka bupati. Kaina aku nang mamandernya," ujar Palui. Imbah itu Palui mambawai kakawalannya dan tatuha warga handak bademo ka kantur pambakal.

"Napa urusan bubuhan ikam pina bajurut datang ka sini, ayu sampaiakan Lui," ujar pambakal.

"Kami datang baik-baik haja, minta baikiakan jalanan di kampung kami karna rusak banar, luangnya ganal-ganal, batunya bahamburan, babanyu, pinggir jalanannya rumbih kada kawa dilalui lagi. Kalu kada dibaiki, kami akan jalan pintas haja," ujar Palui pina manggitir-gitir bapander di hadapan pambakal.

"Sabar Lui, sabar Lui, kalu kawa kita gawi bagutung ruyung, maminta bantuan camat, kada usah lakas-lakas ma-ambil jalan pintas sampai ka bupati," ujar pambakal mambujuki.

"Jalan pintas itu kita tempuh kalu kita kada mampu lagi ma-atasinya, manyupanakan banar kalu hanya sual luang dan batu bahamburan sampai ma-ambil jalan pintas," ujar pambakal.

"Kami minta waktu kasanggupan pambakal atawa camat, dua minggu atawa sabulan, bila kada dibaiki kami tapaksa mamakai jalan pintas," ujar Tulamak pina ma-ancam.

"Ayu ja isuk aku ka kantur camat dan ka kantur PU maurusakan," ujar pambakal.