Si Palui

Si Palui: Saraba Tabalik

WAYAH sama-sama masih babujangan, Bulan Jamilah rakat banar lawan Manya Amat. Sampai sawat baulah kalumpuk bamasakan

Si Palui: Saraba Tabalik
Dok Banjarmasinpost.co.id
Ilustrasi: Si Palui 

BANJARMASINPOST.CO.ID - WAYAH sama-sama masih babujangan, Bulan Jamilah rakat banar lawan Manya Amat. Sampai sawat baulah kalumpuk bamasakan, nang dingaraninya Dua Ratus. Imbah Manya Amat kawin lawan Ahmad Palui, wan sudah baisian anak talu ikung (Amat, Amit, Amut), kalumpuk Dua Ratus tadi ampihan.

Tapi, biar kada rancak lagi bamasakan, buhannya masih tatap haja bakawal, napa mun rumahnya basubarangan haja pang. Sabujurnya ngaran bini Palui tu Zaleha. Imbah baranak si Amat, lalu dikiyau urang umanya Amat. Supaya kada tapi ngalih manyambat, disingkat jadi Manya Amat.

Tatinggal Bulan Jamilah lagi nang balum kawin. Padahal inya kambang jua di gang situ. Banyak buhan lalakian nang mahandaki, tamasuk si Garbus. Hari-hari umpat jua Garbus malilik si Bulan, sampai matanya jadi pina juling cuntanan. Cangkal banar inya manggaluti. Pukuknya napa haja dihakuninya, asal si pujaan hati hakun lawan inya. Nang ampun diri maka am kada hiran-hiran. Suah Garbus dikantuti Bulan, paharatan mairingi inya wayah handak ka pasar. Tapi Garbus kada sarik, himung lagi inya.

“Itu isyarat cintanya,” ujar Garbus kaya pujangga. Suah jua Garbus dipukuli urang sapasaran, marga Bulan manguciaki maling wayah Garbus bapaksaan handak mambawaakan tatukaran matan pasar. Garbus tatap haja kada jara, padahal sampat diupname di rumah sakit.

Hampadal Garbus dasar ganal. Dasar waja sampai ka puting sakalinya. Barakat cangkal, dapatnya jua si Bulan Jamilah naitu. Kada marga napa pang, Bulannya maras banarai lawan Garbus. Tapi Garbus kada paduli. Nang panting Bulan dapatku, ujarnya dalam hati. Kada kesah tu pang inya kahimungan. Sampai hakun maandak payung kambang nang barangkap ka Kalampaian. Lalu manduabulanan puasa, titir, kada bulih bahalat-halat hari.

“Hibat ikam Bus lah, kada disangka kaguguran indaru jua,” ambung Tulamak wayah buhannya takumpul di warung Manya Amat, bini Palui. Garbus pura-pura kada mandangar.

“Napa ujar ikam tadi, Mak?” ujarnya sambil manyambut kupi nang disurung Manya Amat.

“Cah. Ikam tu handak minta sambati dua kali banarai, Bus ai.”

“Kadanya kaya itu pang. Aku dasar kada mandangar lalu pandiran ikam tadi.”

Tulamak kada manyahuti lagi, asik haja maharu kupi nang hanyar dijulung Manya Amat. Sakalinya, tumatan tadi Palui maitihi haja lawan kalakuan kakawalannya. Sambil manjumput wadai, umpat jua inya manyurung pandir.

Halaman
12
Editor: Didik Trio
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved