Si Palui

Si Palui : Sajadah Halus

Tulamak pusang banar maraga kangangalihan bacari baju wan salawar nang cucuk wan ukuran awaknya

Si Palui : Sajadah Halus
Dok Banjarmasinpost.co.id
Si Palui : Sajadah Halus 

BANJARMASINPOST.CO.ID - Tulamak pusang banar maraga kangangalihan bacari baju wan salawar nang cucuk wan ukuran awaknya. Jadi tapaksa inya manukar bahan gasan diupahakan baulah baju wan salawar di tukang jahit.

"Awak lamak itu pasti haran kain," ujar Garbus manyindir Tulamak.

"Kalu bahiri wan sindir-manyindir kada usah ka kain Bus ai, langsung haja sambat bahwa aku gancang makan," sahut Tulamak.

"Maksudku kada manyindir Mak ai, tapi hanya manyambat bahwa ikam pasti parlu banyak duit gasan manukar kain baulah baju dan baulah salawar," ujar Garbus.

"Nah, itulah nang jadi pikiranku karna wayah ini ada pasar tungging, pasar pambilajaan nang bajual pakaian jadi matan luar nageri. Baju salawar luar nageri itu mustinya ganal-ganal tapi nyatanya kadada nang sadangnya wan awakku," ujar Tulamak.

"Kada usah sakit hati awak lamak Mak ai karna awak lamak itu tanda hidup makmur, cukup makan," ujar Garbus.

"Tarima kasih ikam mamuji aku, artinya ikam paham Bus ai," ujar Tulamak. "Tapi kawal kita si Palui itu nang kada pamahaman" ujar Tulamak,

Banjarmasin Post edisi Jumat (6/3/2020).
Banjarmasin Post edisi Jumat (6/3/2020). (Dok Banjarmasinpost.co.id)

"Kada pamahaman kaya apa Mak?" ujar Garbus.

"Samalam inya hanyar datang baumrah kalu, aku ada dibarinya sajadah halus, sajadah kakanakan," ujar Tulamak.

"Hi’ih aku ada jua dibarinya sajadah kaya itu," ujar Garbus.

"Ehem, ehemmm....," ujar Palui nang hanyar datang manyu’uk matan balakang. "Aku mandangar haja panderan ikam badua itu nang manyambat bahwa aku mambari sajadah," ujar Palui.

"Kami manyambat itu karna ikam baik hati. Kami maucapakan tarima kasih ikam mambawaakan ulih- ulih kurma, kismis, banyu zamzam, tasbih dan sajadah," ujar Tulamak babarasih diri.

"Aku singhaja mambari bubuhan ikam ini sajadah halus karna rancak kulihat bila ikam sembahyang pasti lapik pasujudannya adalah saputangan. Saputangan itu halus ukurannya, makanya kutukarakanlah sajadah nang saukuran saputangan. Andaikata bubuhan ikam sembahyangnya rancak mamakai sajadah ganal maka pasti kutukarakan sajadah ganal," ujar Palui mambalas.

"Karna sajadah barian ikam itu ukurannya halus, baik dan mungil maka sajadahku itu diminta anakku dan dipadahakannya sajadah itu adalah sajadah kakanakan, lalu dirabutinya," ujar Tulamak marayu maharap cagar ada panggantiannya matan Palui.

"Kabalujuran aku hanya manukar babarapa lambar haja Mak ai, maka sebagai panggantinya ikam kubari saputangan haja gasan mangganti saputangan ikam nang sudah rabit itu," ujar Palui tatawa sambil manjulung saputangannya. (banjarmasinpost.co.id/bpost/tam)

Editor: Didik Trio
Ikuti kami di
KOMENTAR

BERITA TERKINI

© 2020 TRIBUNnews.com Network,a subsidiary of KG Media.
All Right Reserved