Kada Rasuk
LAWAS sudah Palui jadi huhulutan kakawalannya maraga kupiahnya nang itu matan sabaharian kada suah baganti.
lihat foto
“Diculup ka sungai matian tu pang iwak,” ujar Garbus manyirit ka kupiah Palui.
“Tapi bubuhan ikam kada tahu barakat kupiah ini, aku rancak diundang saruan, mun kuhitung bisa ratusan kali sudah,” ujar
Palui mambila diri.
“Artinya harga kupiah ikam ini liwat pada lek lah? hitung haja harga kupiah misal Rp20.000, ka saruan 4 kali haja sudah tabulik
mudal,” ujar tulamak mahapak Palui.
Ahirnya Palui kada tahan jua tatarusan kana sambati.
Singhaja dibawainya Tulamak wan Garbus mangganii tulak ka pasar manukar kupiah.
Sampai di pasar Palui lalu manyadangi kupiah, matan kupiah haji sampai kupiah hirang. “Cucuklah wan muhaku?” ujar Palui
manakuni Tulamak lawan Garbus sambil mamasang kupiah haji.
“Kada cucuk Lui ai, pina kada pas lawan kapala ikam nang banyak dosa kalu,” ujar Garbus mahuluti.
“Nah ini pas nomor 4 pina mantap banar tajakannya,” ujar Palui sambil mamuruk kupiah hirang.
“Dasar pas pang Lui ai,” ujar Tulamak maiyakan.
“Tapi aku asa takutan mamakai kupiah ini. Kalu kupakai ka rumah kena kada rasuk,” ujar Palui.
“Maka ikam sadangi sudah, pas ja kalu,” ujar Garbus batakun.
“Pas haja kupasang di kapalaku ni, cuma bila kupakai ka rumah kena pasti kada rasuk kahalusan,” ujar Palui pulang.
“Kada mungkin Lui ai baubah, di rumah lawan di toko,” ujar Tulamak bingung.
“Ini rasuk kalu ka kapalaku? Cuba kena ka rumah, pasti kada rasuk lagi, pasti kahalusan. Bila aku paksa bisa rabit,” ujar Palui.
“Buhan ikam dikaramputi Palui. Lawas bakawan wan Palui kada tahu tabiatnya,” ujar panjual kupiah.
“Bujur haja kupiah itu kalu dipakai ka kapala Palui pasti pas, tapi dipakaiakan ka rumah kada harapan rasuk, amun rumah dirasuk kupiah, bisa rabit,” ujar panjual itu lihum kawa maartiakan pandiran maalabiu Palui. (bpt)
