Ubat Ngalu

TUNTUNG pahitungan suara kamarian sakalinya Garbus cuma dapat sapuluh suara. Artinya inya kada kawa jadi anggota dewan. Pina rancak taungut Garbus mamikirakan nasibnya kada jadi baubah, paksaai inya babulik ga gawian lawas maujek pulang kaya kakawalannya.

“Sudah tahu aku siapa-siapa nang basapuluh nang mamilih aku itu Lui ai,” ujar Garbus.

“Siapa haja Bus?” ujar Palui.

“Nang jalas biniku saurang, anakku nang pangganalnya, mintuhaku laki bini, mamarinaku sakaluargaan ampat ikung. Sudah barapa suara?” ujar garbus.

“Delapan?” ujar Palui.

“Saikung matan kaluarga biniku, saikungnya lagi suaraku saurangan,” ujar Garbus.

“Baarti bubuhan ikam kadada nang mamilih aku kalo?” ujar Garbus.

“Maka sudah kami padahi, sakali kada tatap kada. Jaka niat ikam baik bapikir ai mamilih ikam,” ujar Tulamak tatawa.

“Kaya apa aku handak maubah nasib, amun kakawalanku saurang kada mandukung,” ujar Garbus bapicik kapala.

“Kanapa Bus sakit kapala kah?” ujar Tulamak mahuluti.

“Sakit kapala haja ah amun mamikirakan mambayari hutang nang di injam gasan ongkos bakampanye,” ujar Palui.

“Hi-ih kapalaku ngalu, rasa rinyut-rinyut handak pacah,” ujar Garbus mangaluh.

“Aku manyaranakan, ubat nang cucuk gasan ngalu ikam tu, bari-i ubat BIARGIN ja. Insya Allah ampih sakit kapala ikam,” ujar Palui.

“Ubat napa Lui? Ubat Biargin? Ubat hanyar kah?” ujar Garbus, lalu langsung mangincang tulak ka toko ubat handak mancari ubat Biargin nang dsaranakan Palui.

Barataan toko ditakuninya kadada nang bajual ubat biargin tadi. Paksa inya babulik manamui Palui wan Tulamak.