Bajalan Batis Tangah Hari

TULAMAK akhirnya sadar saurangan awaknya itu kalamakan banar, sampai pina ngalih bahinak dan lakas manggah. Makanya sudah samingguan ini inya rajin baulah raga baisukan gasan manurunakan barat awaknya.

“Ikam itu Mak ai biarpun bahimat baulah raga kada cagar kurus,” ujar Garbus.

“Maka mantri kasihatan manyaranakan supaya banyaki baulah raga, jalan batis baisukan atawa bakunyung di sungai, pasti kawa manurunakan barat awak,” ujar Tulamak.

“Urang baulah raga itu harus diimbangi wan maatur makanan, kadada artinya banyak baulah raga tapi makannya makin batambah banyak,” ujar Garbus.

“Hi-ih lah Bus, mustinya banyak ulah raga dan dikurangi makannya. Mangurangi makan itu lah nang aku kada kawa, apalagi makanan itu adalah razaki,” ujar Tulamak lihum.

“Artinya ikam itu hidup untuk makan Mak ai, kada makan untuk hidup. Artinya ikam itu kurang labih sapi nang haur makan tarus kadada pikiran nang lain,” ujar Palui nang hanyar datang.

“Umpat batakunlah Lui, kanapa maka tiap tangah hari ikam pina limbui wan paluh?” ujar Garbus.

“Aku singhaja bapaluh tiap tangah hari. Aku bajalan sajam sampai dua jam ka pasar, ka kantur, ka masigit atawa ka lapangan bal,” ujar Palui.

“Kalu bajalan ulah raga itu baisukan Lui ai, kada tangah hari,” ujar Tulamak.

“Bajalan tangah hari wayah hari panas sampai bapaluhan adalah ‘ubat’ Mak ai,” ujar Palui.

“Ubat napa Lui? Bajalan tangah hari wayah panas bisa manggaringi awak,” ujar Tulamak.

“Bajalan tangah hari wayah panas sampai bapaluhan itu adalah ubat gula, ubat panyakit gula, ubat diabetis,” ujar Palui.

“Napa buktinya Lui?” ujar Garbus.

“Buktinya, gula itu lakas lunuh bila dimasukakan ka dalam banyu panas, makanya bila bajalan di panas tangah hari, bapaluhan, maka panyakit gulanya lakas kaluar malalui paluh,” ujar Palui pina saraba tahu.

“Hi’ih lah, masuk akal jua Lui ai. Isuk aku umpat jua bajalan tangah hari, biar bapaluhan supaya luntur lamak dalam awakku. Kalu gula bisa cair kapanasan maka lamakpun kaya itu jua,” ujar Tulamak parcaya panderan Palui. (bpt/tam/rep)