Si Palui:Mancari Kapala

DUDUKAN di warung pasti handak mancari kapala, apalagi di warung katupat Kandangan, nang dicari kapala haruan. Dududkan di kantur pasti nang dicari pamulaan mana kapala kanturnya? Kaya itu jua kalu di sakulahan, pasti guru manakunakan mana kapala sakulahnya, kada talihat.

“Orang dimana haja berada Bus ai, pasti mancari kapala?” ujar Palui ka Garbus.

“Kapala apa pulang Lui?” sahut Tulamak lakas.

“Apalagi binian pasti lakas nang dicarinya kapala?” Garbus baucap lihum buhannya badua.

“Itu bagi binian nang sudah balaki, kapala ya nang dicarinya banar?” sambung Palui.

“Kapala apa maksud ikam Lui?” takun Tulamak.

“Kapala rumah tangga maksudku, sampai tiga hari kapala rumah tangga kada bulik ka rumah tanpa habar, pasti galu nang bini di rumah, jadi panting banar adanya kapala dalam keluarga itu?” jawab Palui kada mau kalah.

“Dasar bujur Lui ai, kapala rumah tangga alias si abahnya harus banyak di rumah, supaya tenang anak wan bini di rumah,” sahut Garbus manambahi jar Palui.

Utamanya Palui, karana rajin mambaca surat kabar kesayangan urang Banua, lalu tahu kesah wan habar urang di Banua ini.

”Ikam tahulah Mak, bila urang Jakarta atau manteri datang, ka daerah kita, pasti nang dicari urang kapala?” ujar Palui batakun ka Tulamak.

“Kapala apa Lui tadi sudah?” jawab Tulamak bingung.

“Kapala daerah iya kalu Lui?” sahut Garbus manangguh.

“Bujur banar Bus ai, jar ikam itu. Kita di Banua ini, cagar ada dua daerah nang handak mancari kapala daerah hanyar, perlu kita dukung wan sukseskan supaya warga kita di sana rukun, aman, damai dalam mancari sosok kapala daerahnya gasan lima tahun nang akan datang,” ucap Palui kaya pengamat politik di tv haja lagi meyakinkan kawan.

“Mudahan lancar haja Lui lah, pemilukadanya?” ujar Garbus.

“Kada bacakut papadaan, iya kalu Bus?” ujar Tulamak.

Iya banar, Mak ai. Itu am harapan kita barataan,” Palui besemangat banar inya bapander politik. (aan)