Panah Beracun

NANG ngaran panah beracun tertancap dalam hati maski sudah 40 tahun kada parnah betamuan pas reunian alumni SMP cinta lawas bersemi kembali (CLBK) iya haja sudah? Palui lihum saurangan.

“Napa Lui maka lihum saurangan?” rawa Garbus.

“Kada ai Bus lah, kada saikung badua CLBK nitu, maski sudah tuha baisi cucu , tapi nang ngaran liur kada parnah tuha walaupun awak sudah diserang panyakit asam urat tinggi , kolesterol tinggi, kada jadi alasan kada hadir di acara reunian bakas kawan sakulahan bahari, ada nang datang matan Pulau Jawa sana, karana apa nah?” tangguh Palui.

“Karana handak silaturahmi Lui ai?” sambat Tulamak.

“Iya ada bujurnya jua Mak ai, ujar ikam nitu,” sahut Palui.

“Karana handak manganang nostalgia bahari waktu zaman sakulahan,” jawab Garbus.

“Mungkin karana panah asmara beracun nitu tadi, sahingga jarak nang jauh kada alasan kada hadir,” Palui bakisah.

“Apa salanjutnya Lui?” takun Tulamak.

“Ya… mungkin karana sama-sama janda wan duda, sudah ada panah beracun nitu dalam hati masing-masing, kawa haja ditangguh sudah buhannya ai, jangan hiranlah. Kesampaian angan-angan bahari nang masih jadi harapan semu,” Palui bakisah tatawa saurangan.

“Makanya aku Lui ai, bila ada undangan reuni, kada kuturuni,”sahut Tulamak.

“Tamasuk aku jua kada handak turun, apalagi saurang kamana-mana ya basapida mutur butut, umai asa marista diri, kawan-kawan sudah bamutur hanyar berataan, apa kada anjloklah harga diri saurang,” Palui rasa marista karana dirinya masih sarba kakurangan.

“malihat mantan pacar iya kada Lui, inya jadi sosialita sudah, dihiraninya kada ikam iyakah?” ujar Garbus manambahi.

“Bujur Bus ai, baik aku kada hadir bila reunian nitu, saurang tahu diri lah. Kawan-kawan dingin jua wan saurang bila malihat panampilanku kaya urang tuha, batapihan, baju piyama, bakupiah hirang, sadangkan kakawalan lain aksi-aksi inya, bamubil mambawa anak cucu, makinnya ai saurang takuringis,” Palui rasa mindernya tinggi wayahni.

Kada lawas buhannya bapanderan nitu, ada katua RT mambawakan jagung bajarang wan kacang bajarang ka gardu.

”Napa ai pina rami banar buhan ikam bapanderan?” takun pak RT.

“Ini pak RT lah, kisah panah beracun waktu sakulahan bahari, akhirnya tuha sama tuha jadi bejodoh imbah bulikan reunian, karana apa?” ujar Palui mamabawa habar kisah kapada katua RT.

“Karana panah beracun nitu pang Lui ai, iya kada?” sahut katua RT tatawa.

“Ada bujurnya pak RT ai nitu? Tapi nang jelas karana panah beracun nang menancap di dalam hati masing-masing waktu sakulah kada kesampaian, karana balum jodoh, akhirnya imbah 40 tahun hanyar betamuan sama-sama janda wan duda , sudah bacucu eh sakalinya kesampaian wayahni bajodoh barakat reunian, ada nang kaya nitu urangnya,” Palui besemangat bakisah kapada katua RT.

“Hati-hati panah beracun lah, kalau tatancap ka dalam hati binian nang sudah belaki, bayanya am inya kena wani sarak wan lakinya, haur manyasahi saurang haja, handak minta kawini iya am sudah kalau kaya nitu?” Pak RT maingatakan.

“Ulun tarus tarang haja kada wani jua mamanah wan racun ke hati binian nang belakian atau binian bujang. Kalu ah, binian minta kawini, iya haja sudah,” Palui lancar bakisah.

Rami jadinya di gardu, habis jagung wan kacang bajarang. (aan maulana/pemulis matan kuta dudul,HSS)