Si Palui: Misteri Cinta

CINTA manusia memang panuh rahasia Ilahi, kada kawa dipaksa-paksa, kada kawa dihapus-hapus. Bila cinta sudah melakat, apapun rela dilakuni asal demi cinta nitu.

”Napa pulang Lui ikam katuju mangupas masalah cinta?” takun Garbus.

“Cinta nitu kadada habisnya dikupas, ibarat minum makin haus haja, padahal sudah sagalun banyu minum masuk ka parut,” sahut Palui.

“Cinta am nang maulah kita ni kawa hidup ka dunia,” sahut Tulamak.

“Bujur Mak ai, karana cinta kadua urang tuha kitalah maka kita bisa lahir ka dunia,” jawab Palui.

“Apa Lui adakah kisah tentang rahasia cinta atau ujar urang misteri cinta nitu?” takun Tulamak.

“Sual kisah kadada habisnya pang aku Mak ai, makanya rajin mambaca suratkabar kesayangan kita di banua naya,” sahut Palui lihum.

“Apa kisahnya Lui?” Garbus handak tahu jua.

“Biniannya balum tamat SMP sudah dilakiakan ulih abah mamanya, karana nang maambil bini anak urang sugih,” ujar Palui mulai bakisah.

“Nitu pang nyaman bila baduit ni, napa haja handak talaksana. Handak jadi kapala daerahkah, bila duit banyak , urang banyak jua nang mandukung, iyakah Lui?” sahut Garbus.

“Hukum dunia kalu sudah, bila sugih dihurung manusia, kainginan salalu tarlaksana. Tapi, bila susah, kada panduitan kada dihirani urang!” sambat Tulamak.

“Kada kaya nitu pang buhannyalah, biar miskin tapi bermartabat, biar sugih tapi kurang ajar kelakuan, kada baik jua hidup di tengah masyarakat,” jawab Palui.

“Jadi kaya apa kisahnya Lui?” takun Tulamak.

“Karana cinta dipaksa-paksa, akhirnya tahu saurang buhan ikam, nang bini lari pada rumah mintuha nang sugih nitu, karana inya marasa kada tahan, disuruh tarus ulih mintuha, kaya pambantu haja inya. Siang malam tenaga dimanfaatakan mintuha, bulik ka urang tuhanya binian nitu,” Palui lancar bakisah.

‘Sudah nitu basarakankah Lui?” takun Garbus.