Si Palui: Rumput Sabat

ADA istilah wan rancak jadi panderan urang dimana-mana bahwa rumput tetangga nang labat alias sabat lebih indah dipandang mata daripada rumput sorang di halaman rumah, artinya apa? Diumpamakan bini tetangga montok, padat berisi, bini sorang kurisaan,baaksi kada lagi haur bahimpu anak haja, kada ingat lagi ada laki nang suka mata jelalatan.

“Napa Lui katuju malihat rumput tetanggakah?” takun Garbus nang wayahni jadi paman kantur salah satu instansi.

“Kada kaya nitu pang Bus ai, aku asa muar banar malihat kinerja ikam salawas kapala kantur nang hanyar nih,” sahut Palui.

“Napa maka muar, ikam kada nang begawinya?” sahut Garbus ketus.

“Kami handak mamadahi sabagai kawan setia ikam,” Tulamak manyahut sakalinya.

“Inya napa aku saban hari basasapu tarus jam tujuh sudah beres,” Garbus bingung.

“Aku ni tiap hari lewat di muka kantur ikam Bus ai, kulihat rumput sabalah kanan masuk kantur ikam nitu sabat nyaman hajakah ikam malihat, maka ikam salaku patugas kabarsihan kantur nitu!” Palui mamadahi.

“Begaduh ah Lui ai, aku cleaning servis, artinya basasapu haja gawian atau belap lantai, meja atau kursi, kalau bariwas rumput kada tugasku!” ucap Garbus indah kalah.

“Ngarannya patugas kabarsihan nitu salajur manyalajur ai, jangan hanya basasapu haja kabisaan ikam, bila malihat rumput sabat cari cangkul atau cari ubat rumput Bus ai,” saran Tulamak.

Kada lawas datang pagawai nang sakantur wan Garbus. ”Napa raminya Bus?” takun nitu nang bangaran Pak Irja.
“Ni pak mahuwasani gawianku, ujarnya rumput sabat napa maka kada dibarsihi,” Garbus baadu-adu.

“Uh nitukah sakalinya nang diributakan?” Irja manggut-manggut.

Kaya nil ah Bus ai, patugas kabarsihan atau cleaning servis atau apakah ngarannya, bila malihat kada nyaman nitu segera barsihi, jangan mahadang ditagur ulih kapala kantur. Sidin kapala kantur hanyar lagi jadi kuler batatagur wan anak buah, paling kena bila dievaluasi sidin langsung mambari SK barhenti haja, iya am sudah, tanganga ikam kena,” Papadah Irja banahap banar.

“Gajihnya labih sajuta kalu Bus?” takun Palui.

“Bujur Lui ai, gajihnya labih sajuta, aku bahanu kuler jadi kulihatakan haja, karana jarku kapala kantur kadada managur jua sidin, pagawai lainnya cuek haja,” Garbus bakilah.

“Mulai hari nil ah, barsihi rumput sabat nitu, siapa haja kada nyaman malihatnya,” tagas Irja maminta ka Garbus.

“Ayuha Pak Irja ai nah, aku mancari cangkul dahulu,” lakas Garbus ka gudang kantur mancari cangkul.

“Han jarku jadi patugas kabarsihan tapi bisa maakal kaya nitu, kalau disuruh kada manggawi, inya marasa kada tugasnya, artinya pamalar ditulang ya, ujar aruah mama bahari kaya nitu pang kalakuan Garbus nitu,” Palui baucap tatawa Irja wan Tulamak.

“Makanya kalau handak disayang kapala kantur nitu, rajin-rajin begawi,” timpal Tulamak.

“Bujur Mak ai, kaya nitu pang harapanku berataan…” sambung Pak Irja. (aan maulana/penulis matan kuta dudul,HSS)