Si Palui: Moderen

BANYAK manusia nang salah manafsirkan arti moderen dikiranya iya bemaukan nitu adalah urang moderen, padahal nitu adalah kemungkaran wan gawian dosa. Ada jua nang dikira moderen nitu pakaian tipis bawahan singkat, kalihatan batang paha, nitu jar dikira moderen.

”Kaya apa Lui maksudnya modern nitu?” takun Garbus.

“Aku minta jawabakan Tulamak ha nah, kaya apa Mak jawabnya?” sambat Palui.

“Uh ka akulah, kada pas Lui ai, aku hanya tukang parkir, ikam Lui ai nang cucuk karana gawian ikam guru, banyak tahu parkembangan zaman,” sahut Tulamak.

“Ya macam-macamlah tingkahpolah manusia naya. Ngarannya dunia nitu baharu, jadi rami, habis masalah nang satu datang nang lainnya, bagitulah satarusnya salama dunia nitu ada salama itulah masalah salalu datang,” sahut Palui bijak.

“Jadi kaya apa Lui nang dimaksud moderen te?” takun lagi Garbus bahimat.

Nah kebetulan ada binian nang lewat di hadapan buhannya nitu pas dudukan di gardu, dipanggil ulih Palui.

”Uh ding, cuba ka sini, bamandak dahulu satumat nah!” rawa Palui.

“Uh bapak Palui kah,” sapa binian nitu.

“Ni Aluh Mila ngarannya buhannyalah, wayahni duduk di tingkat aliyah, sudah tuntung ujian inya,handak kuliah , iya kalu ding?” ucap Palui, lihum Aluh Milanya.

“Bujur Pak Palui ai, ulun handak kuliah di Banjarmasin kena ni,” sahutnya dangan senyum manis, katuju buhannya malihat.

“Cuba lihat Aluh Mila bapakaian, baju tangan panjang, bajilbab serasi wan bajunya, urangnya sudah langkar makinnya ai, mamakai jilbab rapi sopan wan baradab betambah langkar inya. Ini nah nang ngarannya urang modern buhannya ai?” ujar Palui mamuji ka Aluh Mila.

“Umai Pak Palui ni mamuji tarus ka ulun,” sahut Aluh Mila asa supan inya. Ulun bulik nah, lakas Aluhnya bulik ka rumah.

“Ayuha bulik pian, kalu mama pian mancarii si Aluh langkar naya,” Palui manggayai tarus.

“Nitu Lui lah, urang modern ya, khususnya buhan binian, iya kalu?” sambat Garbus.