Si Palui: Banyak Urusan

WAYAHNI banyak partai nang hanyar jadi Palui dibawai urang supaya jadi pangurus partai. Apalagi pangurusnya betetangga wan Palui, lakas haja inya dibawai urang umpat jadi pangurus parta nitu. ”Uh mamanya wan anakku Amat, abah ni dibawai urang umpat bapartai supaya kena kawa duduk jadi wakl rakyat, kaya apa hakunlah buhan pian?” takun Palui.

“Hakun Bah ai nah, supaya pian kena dapat mutur, gaji banyak,” sahut nang anak.

“Uhui Amatlah, mudahan takabul cita-cita ikam, abah jadi wakl rakyat!” sahut Palui asa himung.

“Ulun te tasarah pan haja, mudahan ai kawa kaya urang lain jua jadi wakil rakyat,” ucap nang bini.

“Dasar bujur Palui, inya handak jadi wakl rakyat bujuran, karana inya duduk di kepengurusan partai X nang marupakan partai hanyar umpat pemilu tahun 2019 mandatang.

”Umai Lui pna sibuk ikam, betentengan map, handak malamar kamana?” takun Garbus.

“Aku handak ka kantur partai sudah nitu kami handak manuju kantur nang manyalanggarakan pamilu,” sambat Palui suka.

Sampai di kantur nang maurusi pamilu nitu barsama pangurus partai lainnya. Giliran Palui diperiksa berkas, ada sabuting jar petugas nang kada lengkap. ”Ikam Lui ai, ijazah kada mancapai syarat nang sudah ditentuakan buhan kami,” ujarnya.

“Apa maksud pian nitu!?” takun Palui pucat muha.

“Ijazah ikam Lui ai hanya tamat SLTP, urang te sarjana atau minimal SLTA, kalau kada kawa melangkapi syarat nitu maka kami gugurakan ikam sabagai bakal calon nang handak duduk jadi wakil rakyat ya!” ujarnya tagas.

“Bah iya pang, kada jadi aku nah, jadi wakil rakyat, nang cagar dapat mubil kena kawa bakuliling mangunjungi rakyat ka kampung-kampung,” Palui sadih sakalinya.

Sudah sampai ka rumah ditakuni ulih anak bini. ”Apa Bah jadi pian pina sadih banar?” rawa nang anak.

“Abah kada diterima jadi bakal calon wakil rakyat Mat ai, mamanya ai, karana kada mamanuhi parsyaratan lagi alias berkas TMS artinya tidak memenuhi syarat,” jawab Palui.

“Uh iyakah Bah, besabar ai lagi, mudahan pian ada razaki dilain nang kada dikira-kira ,” sahut nang anak sambil mancium ka tangan abahnya basalaman handak main kalayangan.

Mandangar Kaka Palui nang kabulujuran ada di rumahnya, matan Banjarbaru situ.