Si Palui: Sapaguruan

“Di zaman canggih sakarang ini tanggung jawab kawitantarhadap anak-anak bulih dibilang tingkat kasulitannya jadi dua kali lipat,” jar Palui wan Tulamak, Tuhalus wan Tuhirang.

“Tapi pangrasaku saparti biasa haja, Lui-ai,” ujar Tuhirang mambahas pandiran Palui. “Partama, kita mambarimakani. Kadua, manukarakan baju-salawarnya. Nang katiga, manyakulahakannya. Kaya itu pang sudah tugas-kawajiban kawitan tarhadap anak matan bahari,” ujar Tuhirang marinci bahasan.

“Maksud ikam ‘sulit dua kali lipat’ nitu kadimapa, Lui?” takun Tulamak.

“Mun ngalih mancariakan gawiannya imbah inya tamat sakulah, mimang bujur-am.”

“Sual ngalih mancariakan gawian tu, kurasa rilatif, Mak-ai. Artinya, ngalih amun balum kapintangannya dapat. Tapi pulang bisa jua sutil haja asal pas lurungnya,” ujar Palui.

“Imbahnya pang, napa nang labih sulit tu?” takun Tuhalus.

“Wayah hini kan ‘ira millinium’, zaman canggih. Jaman kumputir, zaman gatgit, zaman HP! Kakanakan kita inya hamuk amun kada ditukarakan HP, Iya kalu ..?!” jar Palui.

“I-ih.., bujur pang nitu. Tapi imbah ditukarakan hinip-ai lagi inya,” ujar Tuhalus pulang.

“Yah.. Sual manukarakan nitu, taruhlah kada talalu sulit bagi nang kawitan.

Tapi kawalah kita bujur-bujur mahawasi napa-napa nang dituntunnya di HP nitu wayah inya di kamarnya, atau wayah inya bakakawanan?” Takun palui ka buhannya.

“Mun wayah inya di dalam kamar atawa inya bakawanan, ngalih pang mangawasinya,” ujar Tuhalus.

“Nah.. di situ nang jar-ku, maulah baban tanggung jawab kita sabagai kawitan wayah hini manjadi ‘dua kali lipat’. Karna kita harus kawa mamastiakan anak-anak kita tu inya kada manuntun kuntin nang kada karuan tampuh, nang kada mandidik, atau bahkan maunggah kuntin-kuntin purnu!” ujar Palui sarius.

“Tarus.., kadimapa am caranya kita mahindari hal-hal nangkaya itu, Lui?” takun buhannya.

“Kadada lain salain kita harus bujur-bujur mananamkan pandidikan agama, mamparkuat kaimanan sarta mural-akhlak anak-anak kita. Sabab di situlah latak manjaga binting tarakhir nang kawa mamalihara sarta malindungi marika tarhadap pangaruh buruk dari kamajuan tiknulugi sakarang ini,” Palui magin sarius.

“Amun kaya itu, imbah jangan ditukarakan HP, salasai parsualannya,” ujar Tulamak paraktis haja.