Si Palui : Kana Celengi

BANJARMASINPOST.CO.ID - TULAMAK manyaru bubuhan kakawalannya Palui, Garbus, Tuhirang wan tukacut, kaina malam basalamatan ma-aqikahi anaknya nang hanyar lahir. Karna anaknya itu lalakian jadi inya manyumbalih dua ikung kambing.

"Kalu kaya itu malam ini kami makan ganal karih kambing," ujar Garbus.

"Mudahan kami dapat bagian kapalanya," ujar Tuhirang.

"Kapalanya itu sudah jadi bagian tuan guru," sahut Garbus.

Imbah tuntung makanan Tulamak mancari'i Palui karna mulai acara baluman mulai sampai tuntung ini inya kada mandangar suara Palui.

"Mungkin kada ikam saru," ujar Garbus.

"Palui mulai baisukan tulak ka Banjar," sahut Tuhirang.

"Kalu kaya itu, kapala kambing nang sabiginya cagar kusiapakan gasan Palui," ujar Tulamak.

Isuknya si Palui datang ka rumah Tulamak handak minta maaf karna malamnya kada kawa datang saruan ba-aqikahan.

"Aku maaf banar samalam kada datang karna tulak ka Banjar mailangi paninian, hari hujan labat tapaksa tapamalam," ujar Palui.

"Aku maklum haja Lui ai," ujar Tulamak manyurahakan Palui duduk lalu inya langsung kabalakang ma-ambilakan makanan wan nginuman. "Pas banar Lui ai, ikam kutinggali kapala kambing, silakan makan," ujar Tulamak.

"Ikam paham banar kasukaanku Mak ai," ujar Palui sambil mulai makan mahantup utak kapala kambing.

Kada lawas datang bini Tulamak, takajut malihat Palui makan kapala kambing nang disimpannya dalam lamari. Mulai matan higa lawang bini Tulamak babarapa kali mancelengi lakinya, kasarikan kanapa maka kapala kambingnya dimakan Palui. Wayah mancelengi lakinya itu sawat kalihatan ulih Palui, lalu Palui marasa bahwa bini Tulamak sarik maka Palui makin bacapat mahabisakan nasinya.

"Ayu lakasi batambah, nasi masih banyak dan habisakan utaknya," ujar Tulamak manyuruh Palui.

"Aku sudah kanyang, kulihat langit maram mungkin cagar ada patir," sahut Palui karna inya maklum sudah babarapa kali kana celengi bini Tulamak.