Si Palui: Salop Tinggi

BANJARMASINPOST.CO.ID - Bini Palui itu tamasuk wanita karir jua. Katuju umpat baarisan, umpat maurusi posyandu, rancak umpat rapat di RT dan balai desa.

Karna rancak umpat kagiatan jadi banyak takawan dan batamuan urang, baik bubuhan urang biasa ataupun bubuhan urang sugih nang bapakaian macam-macam mudel.

Utumatis karna rancak talihat, marasa urang pina bengkeng maka kacar jua liur handak maumpati, lalu hujung-hujungnya batagihan ka laki.

"Lalu mauuuuuuukkk," ujar Palui gagarunum saurangan.

"Napa dipander Lui, pina gagarunum saurangan," ujar Garbus.

Baca: Mengkritisi Polemik Sistem Zonasi

Baca: JCH Kapuas Masuk Asrama Haji Embarkasi Banjarmasin, Minggu Dini Hari Diberangkatkan ke Tanah Suci

Baca: Ditangkap Pakai Narkoba, Begini Nasib Nunung di Ini Talkshow

Baca: Puluhan Warga Mulur Sukoharjo Jadi Korban Investasi Bodong, Korbannya Petani sampai Guru

"Bibinian itu kada kawa malihat mudel-mudel nang hanyar lalu kacar haja liur handak umpat manuruti," ujar Palui.

"Sayang bini itu sama wan sayang anak Lui ai. Kasihan kalu kada dikabulakan kahandaknya," ujar Garbus.

"Sabujurnya handak haja mangabulakan tapi uncuinya nang kadada," ujar Palui pina sadih.

"Bini handak napa Lui?" ujar Garbus manakuni.

"Biniku itu handak minta tukarakan salop tinggi tumit karna wayah ini ujarnya lagi ngetop," ujar Palui.

"Sual mudel pakaian, baju, tapih, salendang, sipatu, sandal, salop, jam tangan kada kawa dituruti. Kalu dituruti tarus kada cagar kaduitan karna mudel itu lakas baganti-ganti," ujar Tulamak nang hanyar datang pina manasihati.

"Bujur haja ujar ikam itu Mak ai makanya bini ikam disimpan dipingit di rumah haja, jadi kada malihat urang bapakaian macam-macam," ujar Garbus malawanakan Palui.

"Biniku itu tamasuk tamasuk wanita karir Mak ai. Kasihan jua kalu hari-hari tatap haja tapih baju nang itu-itu tarus," ujar Palui.

"Makanya biniku kusayangi dan kukurung tarus di rumah, kusuruh gawian macam-macam supaya kada manjangkit panyakit batatagih," ujar Tulamak.

"Ikam itu Mak ai kada mahargai hak bibinian, karna haknya sama jua wan lalakian," ujar Garbus.