Si Palui : Manukar Nang Pacah

BANJARMASINPOST.CO.ID - PALUI, Garbus wan Tulamak tulakan ka Pasar Ahad handak manukar tantaran, tali wan kawat unjun. Kabalujuran wayah itu sudah tuntung musim tanam wan banyu paharatan dalam. Imbah ka pasaran, bubuhannya langsung tulakan maunjun.

"Umpannya napa nang baik Lui?" ujar Garbus.

"Dahulu umpannya anak karawai, tapi wayahini ngalih dicari. Bisa haja diganti wan nang lain," ujar Palui.

"Kalu aku tatap haja kaya maunjun di banua, umpannya cacing," sahut Garbus.

"Bila umpannya cacing, aku kada tamakan, rasa galianan," sahut Palui.

"Lalu napa panggantinya kalu kadada karawai?" ujar Garbus.

"Biasa kucuba, umpannya kapas diulasi wan acan babanam," sahut Palui.

"Cucuk Lui ai, sama wan aku. Bila kadada acannya, maka kuganti wan T.H," ujar Tulamak umpat manyahut.

"Napa umpan T.H itu Mak?" ujar Garbus handak tahu.

"T.H itu adalah singkatan t - a - h - i," ujar Tulamak sambil lihum maeja sahuruf-sahuruf.

"Wayah ini umpan kapas wan acan itu sudah kuganti. Kapasnya kuulasi wan hintalu. Makanya sambil ka pasar ini sakaligus aku handak manukar hintalu," ujar Palui.

"Itu nah urang bajual hintalu," ujar Garbus manunjuk.

"Barapa haraga hintalu itik ini sabigi makacil?" ujar Palui batakun.

"Kalu hintalu nang baik, saribu rupiah sabiginya," ujar makacil panjual hintalu.

"Kalu nang kada baik itu nang kaya apa?" ujar Palui.