Si Palui: Umpan Maunjun

BANJARMASINPOST.CO.ID - WAYAH tanaman banih di pahumaan mulai malarak ganal, banyunya masih kacap-kacapan maka rami banar urang maunjung iwak sapat atawa iwak papuyu di sasala tanaman

banih itu. Palui wan kakawalannya mancuba jua umpat maunjun lalu tulakan ka pahumaan di hujung kampung.

"Ikam napa umpannya Mak?" ujar Garbus.

"Iwak sapat atawa papuyu ini katuju umpan cacing," ujar Tulamak malihatakan bungkusan cacingnya.

"Aku kada wani wan cacing, jangankan manjapai cacingnya, malihat haja sudah galianan," ujar Garbus.

"Cacing ini kada maigut dan nyaman mancarinya. Ikam napa umpanya Bus?" ujar Tulamak.

"Aku bamudal manukar umpan anak wanyi," ujar Garbus.

"Bubuhan ikam badua ini kada bapikir panjang mambawa umpan maunjun," ujar Palui.

"Kanapa maka kami dipadahakan kada bapikir Lui?" ujar Tulamak manyahut.

"Maunjun itu harus dihitung, pukul barapa tulak, kamana maunjunnya, napa umpannya, iwak napa nang diunjun. Jadi jangan sembarang iwak karna harus sasuai wan kawat dan umpannya tadi," ujar Palui manuduhi kawannya.

"Maunjun wayah baisukan ini pas banar Lui ai karna iwaknya masih lapar-lapar, makanya umpan apa haja pasti dipatuknya. Apalagi bila malihat umpan cacingku nang lamak-lamak ini," ujar Tulamak.

"Sama wan umpanku Mak ai, pasti dikatujui iwak karna anak wan hintalu wanyi ini harum langsung disambar iwak," ujar Garbus.

"Ikam badua ini baandai-andai bahwa iwak pasti mamatuk umpan ikam. Bubuhan ikam kada mahitung bahwa iwak itu sudah hidup di zaman kamajuan karna sudah ada pakan gasan umpan iwak ulahan pabrik. Jadi kada mungkin lagi iwak hakun mamakan makanan cacing atawa anak wanyi itu karna sudah katinggalan zaman," ujar Palui.

"Umpat batakunlah Lui, ikam mambawa umpan napa?" ujar Tulamak handak tahu.

"Umpan iwak itu harus serba guna dan bamanfaat. Andaikata sabaisukanan maulur unjun tapi kada pakulih iwak ba-arti sia-sia, awak uyuh dan lapar. Makanya bapikirlah," ujar Palui.