Si Palui : Karas Ta Ka Ilat

BANJARMASINPOST.CO.ID - TULAMAK parnah tapakalah ulih Palui marga handak manggawi urusan kanyamanan. Wayah itu Tulamak manukar akar pasak bumi nang bahasiat gasan maulah kuat awak. Karna kada paham mamakainya lalu wayah inya batakun wan Palui.

Ujar Palui supaya ditumbuk diulah jadi galapung gasan dikasaiakan ka-barang. Akibat tasalah mamakai lalu bagurai-gurai dan balingsakan hingga baminggu-minggu kapadihan.

"Aku paham haja sudah digawi ikam. Tapi biarpun kalah aku kada sarik jua, karna hati sanang sabab kada tamakan habar lagi," ujar Tulamak manunjuk Palui.

"Makanya mulai dahulu sudah kuanjurakan Mak ai jangan handak bamacam-macam, tarimalah nang sudah dibari ulih nang Kuasa," ujar Garbus.

"Karna aku rajin batakun dan rajin mancuba maka ada haja hasilnya, dan hasil itu mamuaskan banar. Aku dibari urang ubat kuat, haraganya larang banar ulahan amirika," ujar Tulamak.

"Kalu ulahan luar nageri itu aku parcaya. Napa ngaran ubatnya Mak?" ujar Palui pina mulai tatarik.

"Aku kada tahu jua tulisan wan ngaran ubatnya, kudangar-dangar disambat urang ngarannya pigara balangnya biru," ujar Tulamak.

"Bujur Mak ai, aku biasa jua mandangar ngaran ubat itu. Adalah ikam baisian, kawa-lah aku umpat sabiji?" ujar Palui mambisiki Tulamak.

"Aku baisi sabigiannya, makanya kita bagi dua," ujar Tulamak lalu manjulung sapanggalnya.

Palui mangincang bulik ka rumah handak mambuktiakan kamanjuran ubat itu. Sakalinya, imbah sampai di rumah bini Palui masih sibuk baarisan. Palui langsung masuk kamar, sambil manyarik-nyarik mahadangi bininya. Sambil mundar-mandir di kamar mahadangi bininya itu, ubat barian Tulamak tadi diisap-isapnya.

"Umanya ... umanyaaa ... umanaaa ... uummaanaa ... lakati matuk ... matuukkkk ...," ujar Palui kukuriak mangiyau bininya pina kada lantas lagi.

"Napa abahnya, pina kukuriak nyaring banar. Aku paham haja, aku paham haja," ujar bininya mamaraki Palui.

"Wawawaaa ... wawaawaaa ...," ujar Palui takulum-kulum kada jelas napa nang disambatnya sambil manunjuk ka ilatnya.

Bininya paham, rupanya ilat Palui pina karas kada kawa digarak-garakan, baucap pina pilur. "Napa abahnya maka pina pilur, kanapa ilat ikam pina karas," ujar bininya batakun. Palui malihatakan putungan ubat barian Tulamak nang habis dilumulumunya. Rupanya karna dilumu dan dipalit-palitakan ka ilat itulah maka ilat jadi karas.

Wayah Tulamak mandangar bahwa Palui tasalah manggunakan ubat kuat itu nang mustinya dimakan gasan mangarasakan barangnya, tanyata taalih mangarasakan ilatnya. "Pambalasan labih kejam dari pambunuhan," ujar Tulamak kalikikan karna inya marasa babarapa kali digawi Palui. (ivd/mht)